पुणे: चौकात सिग्नलला डस्टबिन पेपर विकणार्या दोन अल्पवयीन मुलींना ओळखीतील दोन मुलांनी गाडीवर बसवून घरी नेऊन एक दिवस घरी ठेवून त्यांच्यावर बलात्कार केल्याचा धक्कादायक प्रकार उघडकीस आला आहे. याप्रकरणी दोन अल्पवयीन मुलांसह त्यांच्या दोन आईंवर शिवाजीनगर पोलिस ठाण्यात गुन्हा दाखल केला आहे. याबाबत पीडित मुलीच्या आईने आरोपीविरोधात तक्रार दिली आहे.
संबंधित मुली शहरातील एका भागात डस्टबिन बॅग विक्रीचा व्यवसाय कुटुंबासह करतात आणि फुटपाथवरच राहतात, तर आरोपी मुले हे दुसर्या एका जागी फूल विक्री करून रस्त्यावरच राहतात. पीडित मुलींची एक बहीण ही आरोपीच्या नातलगास दिली असल्याने ते एकमेकांच्या ओळखीचे आहेत.
आरोपी मुले हे भाऊ आहेत. 17 मार्च रोजी सदर दोन अल्पवयीन मुले ही त्यांच्या राहत्या ठिकाणाजवळ आली व त्यांनी सदर दोघींना बहिणीशी भेट घालून देतो, असे सांगून दोघींना फूस लावून गाडीवर नेले. तेथे आरोपींची आई देखील उपस्थित होती. त्यांना पीडित मुलींनी पुन्हा घरी सोडण्याकरिता विनंती केली. परंतु, त्यांनी त्यांचे ऐकले नाही. त्या एक दिवस राहिल्यावर दोन्ही मुलांनी दोघींवर लैंगिक अत्याचार केल्याबाबतचा गुन्हा दाखल केला आहे. महिला पोलिस उपनिरीक्षक एस. हिरे याप्रकरणी पुढील तपास करत आहेत.
आठ वर्षांच्या मुलीवर बलात्कार
वाघोली परिसरात शाळेत जात असलेल्या आठवर्षीय अल्पवयीन मुलीचा 23 वर्षीय तरुणाने पायी पाठलाग केला. त्यानंतर तिला जबरदस्तीने पकडून निर्मनुष्यजागी नेत तिच्यासोबत बळजबरी करत लैंगिक अत्याचार केल्याचा प्रकार घडला. याप्रकरणी पीडित मुलगी घरी गेल्यानंतर तिने पालकांना घडलेला प्रकार सांगितला. अखेर पीडितेच्या 30 वर्षीय आईने याबाबत वाघोली पोलिस ठाण्यात तक्रार दाखल केली असून, आरोपीला अटक केली आहे. सहायक पोलिस आयुक्त प्रांजली सोनवणे तपास करत आहेत.