Weather Alert Maharashtra
पुणे: राज्यात मंगळवार (दि. 6) ते गुरुवार (दि. 8 मे) या तीन दिवसांत विजांच्या कडकडाटासह गारपीट अन् पावसाचा इशारा हवामान विभागाने दिला आहे. गुजरात आणि मध्य प्रदेशात या कालावधीत अतिवृष्टीचा इशारा देण्यात आला आहे, त्यामुळे महाराष्ट्रात मोठ्या पावसाचा अंदाज आहे.
दरम्यान, रविवारी राज्यातील तापमानात किंचित घट झालेली दिसून आली. विदर्भातील अकोला शहरात 42 अंश तापमानाची नोंद झाली, तर पुणे शहराचा पारा 36.8 अंशांपर्यंत खाली आला होता. (Latest Pune News)
ईशान्य अरबी समुद्र आणि लगतच्या गुजरातच्या किनार्यावर कमी दाबाचा पट्टा तयार झाला आहे. त्यामुळे देशातील सर्वच भागांत आज सोमवार (दि. 5) ते शनिवार (दि. 10 मे) दरम्यान पावसाचा अंदाज आहे.
त्यात गुजरात, राजस्थानमध्ये गडगडाटी वादळे, विजांचा कडकडाट आणि सोसाट्याचे वारे वाहण्यास सुरुवात झाली आहे. त्यामुळे या राज्यात 6 ते 8 मेदरम्यान अतिवृष्टीचा अलर्ट देण्यात आला आहे. त्याचा परिणाम महाराष्ट्रात दिसणार असल्याने 6 ते 8 मेदरम्यान राज्यात मध्यम पावसाचा इशारा देण्यात आला आहे.
...या राज्यांमध्ये राहणार अशी स्थिती
गुजरात, मध्य प्रदेश, राजस्थान, ओडिशा, झारखंडमध्ये काही ठिकाणी वार्याचा वेग ताशी 70 ते 100 कि.मी. असणार आहे. तसेच, अरुणाचल प्रदेश, आसाम, मेघालय, नागालँड, त्रिपुरा, तमिळनाडू, पुद्दुचेरी, कराईकल, केरळ, माहे, कर्नाटक, आंध्र प्रदेशचा किनारी भाग, तेलंगणामध्येदेखील वारे वाहण्यास सुरुवात झाली आहे.
रविवारचे तापमान...
मुंबई (कुलाबा) 34.2, सांताक्रूझ 34.7, पुणे (शिवाजीनगर 36.8, लोहगाव 39.8), अकोला 42, रत्नागिरी 34, डहाणू 37, जळगाव 42.8, कोल्हापूर 37, महाबळेश्वर 32.3, मालेगाव 42.2, नाशिक 37.3, सांगली 38.7, सातारा 39.2, सोलापूर 42.5, धाराशिव 42, छत्रपती संभाजीनगर 40.4, परभणी 42.4, अकोला 44.3, बुलडाणा 40, ब्रह्मपुरी 42.6, चंद्रपूर 43.4, गोंदिया 39.1, नागपूर 41.6, वाशिम 43, वर्धा 42, यवतमाळ 43.4.