पुणे; पुढारी वृत्तसेवा : जलसंपदा विभागाच्या महाराष्ट्र कृष्णा खोरे विकास महामंडळाच्या वतीने खडकवासला धरणाजवळ असलेल्या 28 एकर मोकळ्या जागेत पर्यटनस्थळ विकसित करण्याचा प्रस्ताव होता. त्यादृष्टीने या प्रकल्पासाठी निविदाही मागविण्यात आल्या होत्या. मात्र, पात्र निविदाधारकांकडून पर्यटनस्थळ विकसित केल्यानंतर जलसंपदा विभागाला देण्यात येणारी रक्कम आणि या जागेची किंमत याचा मेळ बसत नसल्याने हा प्रकल्प बारगळला आहे.
तरीदेखील जलसंपदा विभागाने याबाबत निर्णय घेण्यासाठी राज्य शासनाला प्रस्ताव पाठविला असून, शासनाकडून अद्याप कोणताही निर्णय घेण्यात आलेला नाही. खडकवासला धरण, सिंहगड किल्ला ही स्थळे पर्यटकांसाठी कायमच आकर्षण ठरली आहेत. या पर्यटकांना आणखी चांगल्या सोयीसुविधा मिळाव्यात यासाठी खडकवासला धरणानजिक जागा उपलब्ध आहे. या जागेत अतिक्रमण होण्याची शक्यता आहे.
त्यामुळे या जागेचा उत्पन्न मिळण्यासाठी खडकवासला धरणानजिकच्या 28 एकर जागेत बांधा- वापरा आणि हस्तांतरित करा (बीओटी) या तत्त्वावर पर्यटनस्थळ विकसित करण्याचा प्रस्ताव होता. याबाबत खडकवासला पाटबंधारे विभागाचे कार्यकारी अभियंता विजय पाटील म्हणाले, 'खडकवासला धरणानजिक पर्यटनस्थळ विकसित करण्याचे प्रस्तावित करण्यात आले होते. त्याकरिता पाच निविदा विभागाकडे प्राप्त झाल्या होत्या. छाननीनंतर तीन निविदा पात्र ठरल्या होत्या. त्या मान्यतेसाठी राज्य शासनाकडे पाठविण्यात आल्या होत्या.