सुपे उपबाजारात झालेल्या लिलावात लिंबास प्रतिकिलो 92 रुपये असा उच्चांकी दर मिळाला असून, किमान प्रतिकिलो 65 रुपये व सरासरी प्रतिकिलो 80 रुपये असे दर निघाले. जळोची उपबाजार येथील भाजी मार्केटमध्ये बुधवारी (दि. 28) कांद्यास प्रतिक्किंटल कमाल 4 हजार 600 रुपये व सरासरी 3 हजार 450 रुपये असे भाव निघाले. पुणे शहर जवळ असल्याने लिंबास मोठ्या प्रमाणात मागणी आहे तसेच लिंबू खरेदीसाठी बाहेरील खरेदीदार येत आहेत. बाजारपेठेत लिंबू व कांद्यांस मागणी असल्याने आणि आवक कमी असल्याने उच्चांकी दर मिळत आहेत, अशी माहिती सभापती सुनील पवार व उपसभापती नीलेश लडकत यांनी दिली.
सुपे उपबाजार येथे दर बुधवारी लिंबू लिलाव होत असतात. बारामती तालुक्यासह दौंड, पुरंदर या भागातील शेतकरी लिंबू विक्रीस घेऊन येत आहेत. लिंबू व कांद्यास स्थानिक बाजारपेठेत किरकोळ विक्रीसाठी आणि अन्य पेठेतदेखील मागणी वाढत असल्याने आणखी दर वाढतील, असे अपेक्षित आहे. परंतु चांगल्या मालास उच्च दर मिळत असल्याने लिंबू व कांदा उत्पादक शेतकर्यांनी आपला माल ग्रेडिंग व निवडून आणल्यास आणखी जादा दर मिळतील, अशी अपेक्षा आहे.
समितीच्या बाजार आवारात शेतमालाचे अचूक माप, लिलावापूर्वी गोणीचे वजन व त्याच दिवशी पट्टी तसेच उघड लिलाव पद्धतीने विक्री व समितीचे नियंत्रण यामुळेच शेतकर्यांचा आर्थिक फायदा होत आहे.अरविंद जगताप, सचिव, बारामती कृषी उत्पन्न बाजार समिती.