आळंदी; पुढारी वृत्तसेवा : प्राथमिक शिक्षक बदली प्रक्रियेतील सहावा राऊंड रद्द अथवा स्थगित करण्यात यावा; अन्यथा 11 एप्रिल रोजी धरणे धरू, असा इशारा कास्ट्राईब शिक्षक महासंघाचे राज्याध्यक्ष गौतम कांबळे यांनी दिला आहे. कांबळे म्हणाले की, प्राथमिक शिक्षकांच्या 2022 च्या बदली प्रक्रियेतील चौथ्या टप्प्यामध्ये अनियमितता झालेली आहे.
चौथ्या टप्प्याची बदली प्रक्रिया सुरू होण्यापूर्वी बदलीपात्र सेवाज्येष्ठ शिक्षकांमधून दुर्गम भागातील रिक्त जागा भरण्यासाठी सेवाज्येष्ठता यादी तयार करणे आवश्यक होते; परंतु तसे न करता काही सेवाज्येष्ठ शिक्षकांच्या सुगम क्षेत्रातील एका शाळेवरून सुगम क्षेत्रातीलच दुसर्या शाळेवर बदल्या करण्यात आल्या. त्यानंतर दुर्गम भागातील रिक्त जागा भरण्यासाठी सेवाज्येष्ठता यादी तयार करण्यात आली. त्यामुळे सेवाकनिष्ठ शिक्षकांची नावे या यादीत आली व त्यांच्या बदल्या दुर्गम भागात झाल्या. हा त्यांच्यावर झालेला अन्याय असून, तो दूर करण्यात यावा.
सध्या केंद्रप्रमुख पदोन्नतीची प्रक्रिया सुरू आहे. यामध्ये पदवीधर शिक्षक या पदावर काम करणार्या शिक्षकांना संधी देण्यात येणार आहे; परंतु त्यातील अनेक शिक्षक बी. एड. किंवा अन्य तत्सम पदवी घेऊन प्रशिक्षित झालेले नाहीत. अशा अप्रशिक्षित पदवीधर शिक्षकांची केंद्रप्रमुख म्हणून नियुक्ती झाल्यास विद्यार्थ्यांना व शिक्षकांना योग्य मार्गदर्शन मिळणार नाही. त्यामुळे या सर्व बाबींचा गांभीर्याने विचार करावा व प्रशिक्षित असलेल्या उपशिक्षकांनाही केंद्रप्रमुख पदावर काम करण्याची संधी उपलब्ध करून द्यावी, असे कांबळे यांनी शेवटी म्हटले आहे.