Six dead Ganpati Visarjan Pune
चाकण/तळेगाव ढमढेरे/ नारायणगाव: खेड, शिरूर आणि जुन्नर या तालुक्यांत शनिवारी (दि. 6) गणेश विसर्जनादरम्यान दुर्दैवी घटना घडल्या. खेडमधील वाकी, बिरदवडी, शेलपिंपळगाव; शिरूरमधील तळेगाव ढमढेरे आणि जुन्नर तालुक्यातील निमगाव सावा परिसरात सहा जणांचा विहीर, नदीपात्रातील पाण्यात बुडून मृत्यू झाला आणि काहींचा शोध अद्याप सुरू आहे. (Latest Pune News)
भामा नदीत दोन युवकांचा मृत्यू
चाकणजवळील वाकी खुर्द हद्दीत भामा नदीकाठी गणेश विसर्जनासाठी गेलेले अभिषेक अशोक भाकरे (वय 21, रा. कोयाळी, ता. खेड) व अनंत जयस्वाल (वय 20, रा. चाकण, ता. खेड) यांचा बुडून मृत्यू झाला. एका युवकाला वाचविण्याचा प्रयत्न करताना दोघेही पाण्यात बुडाले. अभिषेकचा मृतदेह बाहेर काढण्यात आला असून, अनंतचा मृतदेह रात्री उशिरापर्यंत सापडला नव्हता. चाकण रेस्क्यू टीम, एमडीएफ आणि अग्निशमन विभागाचे जवान शोध मोहीम राबवत आहेत.
बिरदवडीतील विहिरीत तरुण बुडाला
बिरदवडी (ता. खेड) येथे गणेश विसर्जनादरम्यान संदेश पोपट निकम (वय 36, मूळ रा. सिन्नर, जि. नाशिक) यांचा विहिरीत बुडून मृत्यू झाला. पोहता येत असूनही ते पाण्यात खेचले गेल्याचे प्रत्यक्षदर्शींनी सांगितले. निकम यांना चांगल्या प्रकारे पोहता येत असताना घडलेल्या या घटनेबाबत आश्चर्य आणि हळहळ व्यक्त होत आहे.
शेलपिंपळगावातही एक जण बुडाला
शेलपिंपळगाव येथे देखील विसर्जनावेळी एक जण बुडाल्याची माहिती रात्री उशिरा समोर आली. रेस्क्यू टीम घटनास्थळी पोहचून शोधकार्य सुरू केले.
धरणातून विसर्ग; प्रशासनाचे आवाहन दुर्लक्षित
दरम्यान, भामा आसखेड धरणातून पाण्याचा मोठ्या प्रमाणात विसर्ग सुरू असल्याने नदीत प्रचंड प्रवाह होता. प्रशासनाने वारंवार नदीपात्रात न उतरता मूर्तिसंकलन केंद्रांचा वापर करण्याचे आवाहन केले होते. मात्र, काही जणांनी धाडस करीत नदीत प्रवेश केला आणि चौघांचे जीव या बेपर्वाईत गेले.
निमगावसावा येथील घटना
जुन्नर तालुक्यातील निमगावसावा येथील कुकडी नदीत सार्वजनिक गणपतीचे विसर्जन करताना अशोक खंडू गाडगे (वय 30) बुडाले. अधिक पाण्यामुळे आणि पाण्यात भवरा असल्यामुळे दमछाक झाल्याने ते बुडले. त्यांचा मृतदेह दुसर्या दिवशी सकाळी आढळला. स्थानिक तरुणांनी पहिल्या दिवशी त्यांचा शोध घेतला होता.
तळेगाव ढमढेरे येथे युवक बुडाला; शोध मोहीम सुरू
तळेगाव ढमढेरे (ता. शिरूर) येथील भीमा नदीत भीमराव लक्ष्मण चेरले (वय 31, सध्या रा. भीमाशेत, तळेगाव ढमढेरे, ता. शिरूर; मूळ रा. शिरशी, ता. कंधार, जि. नांदेड) हा तरुण बुडाला. अर्जुन राठोड व भीमराव हे दोघे पाण्यात गेले होते. मात्र, भीमरावला पाण्याचा अंदाज आला नाही. आपदामित्र व अग्निशमन दलाने दोन दिवसांपासून शोध मोहीम सुरू केली आहे. या सर्व घटनांमुळे तालुक्यात शोककळा पसरली असून, प्रशासनाने नागरिकांना नदीत सावधगिरी बाळगण्याचे आवाहन केले आहे.