पुणे : पुढारी वृत्तसेवा : क्रीडा व युवक सेवा संचालनालयाच्या विभागीय क्रीडा संकुल येथील जलतरण तलाव चालविण्यासाठी ई निविदा प्रक्रिया राबविण्यात आली. यामध्ये 45 लाख रुपये देखभाल-दुरुस्तीसह रक्कम असताना ती केवळ 28 लाख 10 हजार रुपयांमध्ये खासगी संस्थेला दिल्याचा धक्कादायक प्रकार समोर आला. येरवडा येथील विभागीय क्रीडा संकुल येथे क्रीडा विभागाचा जलतरण तलाव चालविण्यासाठी ई-निविदा प्रक्रिया राबविण्यात आली होती. त्यामध्ये सुरुवातीला दोन जणांचे टेंडर आले होते. परंतु, त्यामधील एक रद्द झाल्याने पुन्हा प्रक्रिया नव्याने केली. यामध्ये 1 जानेवारी ते 31 डिसेंबर 2019 साठी 45 लाख रुपयांची रक्कम असताना केवळ 28 लाख 10 हजार रुपयांना अंतिम मंजुरी दिली.
याचप्रमाणे 1 जानेवारी ते 31 डिसेंबर 2020 साठी 49 लाख 50 हजार असताना 28 लाख 70 हजार रुपयांना, 1 जानेवारी ते 31 डिसेंबर 2021 साठी 54 लाख 45 हजार असताना 29 लाख 20 हजार रुपयांना, 1 जानेवारीते 31 डिसेंबर 2022 साठी 59 लाख 89 हजार 500 रुपयांना असताना 29 लाख 50 हजार रुपयांना तर 1 जानेवारी ते 31 डिसेंबर 2023 साठी 65 लाख 88 हजार 450 असताना 30 लाख 40 हजार रुपयांना अंतिम केली आहे. एकूण तफावत तब्बल 1 कोटी 28 लाख 82 हजार 950 रुपयांची दिसून येत असून, शासनाचा महसूल बुडविला.
जलतरण तलावाबाबत ई-निविदा आणि प्रत्यक्षात अंतिम असलेली रक्कम यामध्ये तफावत दिसून येत आहे. शासनाने याबाबत संबंधित कंपनीवर योग्य ती कार्यवाही करून शासनाची बुडीत रक्कम वसूल करावी.
– विशाल केचे, सहसचिव, युवा सेना
जलतरण तलावाची निविदा प्रक्रिया ही 2019 पूर्वी झालेली आहे. याबाबत जिल्हा क्रीडा अधिकारी कार्यालयामध्ये अर्ज आला आहे. त्यानुसार चौकशी सुरू आहे. ती पूर्ण होऊन अहवाल सादर करण्यात येईल.
– महादेव कसगावडे, जिल्हा क्रीडा अधिकारी
लोकल ते ग्लोबल बातम्यांसाठी डाऊनलोड करा दैनिक पुढारीचे Android आणि iOS मोबाईल App.
'Pudhari' is excited to announce the relaunch of its Android and iOS apps. Stay updated with the latest news at your fingertips.
Android and iOS Download now and stay updated, anytime, anywhere.