पुणे: पहिली ते आठवीसाठी इंग्रजी शाळांमध्ये मोफत शिक्षणाची कवाडे उघडणार्या आरटीई प्रवेश प्रक्रियेसाठी शाळा नोंदणीची प्रक्रिया पूर्ण झाली असून, येत्या 13 जानेवारीपासून विद्यार्थ्यांना नोंदणीची संधी दिली जाणार आहे. यंदा जवळपास साडेनऊ हजार शाळांची नोंदणी केली जाणार असून, एक लाखाहून अधिक जागा प्रवेशासाठी उपलब्ध होणार असल्याची माहिती प्राथमिकशिक्षण विभागातील अधिकार्यांनी दिली आहे.
आर्थिक दुर्बल आणि वंचित घटकांतील विद्यार्थ्यांसाठी शिक्षण हक्क कायद्यानुसार पहिली ते आठवीसाठी इंग्रजी शाळांमध्ये मोफत शिक्षणाची विद्यार्थ्यांना सुविधा उपलब्ध केली जाते. संबंधित विद्यार्थ्यांचे शुल्क सरकारमार्फत संबंधित शाळांना शुल्क प्रतिपूर्तीद्वारे देण्यात येते. यंदा प्रवेश प्रक्रियेसाठी 18 डिसेंबरला शाळा नोंदणीची प्रक्रिया सुरू झाली.
नोंदणीसाठी 31 डिसेंबरची मुदत देण्यात आली. परंतु अपेक्षित नोंदणी न झाल्यामुळे प्राथमिक शिक्षण संचालनालयाच्या वतीने 4 जानेवारीपर्यंत शाळा नोंदणीला मुदतवाढ देण्यात आली. सध्या आरटीई पोर्टलवर दिसून येत असलेल्या आकडेवारीनुसार 8 हजार 316 शाळांची नोंद झाली असून, 1 लाख 1 हजार 474 जागा उपलब्ध झाल्या आहेत.
परंतु सर्व्हरच्या तांत्रिक अडचणींमुळे शाळांची नोंदणी पोर्टलवर बाकी असून, येत्या दोन दिवसांमध्ये साडेनऊ हजार शाळांची नोंदणी पोर्टलवर दिसून येईल तसेच रिक्त जागांचीही वाढ होणार असल्याचे अधिकार्यांनी स्पष्ट केले आहे.
पुण्यात 14 हजारांवर जागा उपलब्ध
आरटीई प्रवेश प्रक्रियेत दरवर्षी सर्वाधिक जागा पुण्यात उपलब्ध असतात. यंदादेखील प्रवेशासाठी 758 शाळांची नोंदणी झाली असून, 14 हजार 274 जागा उपलब्ध झाल्या आहेत. पुण्यात साधारण 900 हून अधिक शाळांची नोंदणी होत असते. त्यामुळे पुण्यातदेखील पुढील दोन दिवसांमध्ये शाळा तसेच जागांमध्ये मोठ्या प्रमाणात वाढ होणार असल्याचे स्पष्ट झाले आहे.
शाळा नोंदणीची प्रक्रिया पूर्ण झालेली आहे. त्यामुळे पुढील आठवड्यात 13 जानेवारीपासून विद्यार्थी नोंदणीची प्रक्रिया सुरू करण्यात येणार आहे.यंदा साडेनऊ हजार शाळांची नोंदणी होणार असून,1 लाखाहून अधिक जागा प्रवेशासाठी उपलब्ध करण्यात येणार आहेत.- शरद गोसावी, संचालक, प्राथमिक शिक्षण संचालनालय.