Maharashtra Weather Report
पुणे : तामिळनाडू आणि लगतचा भाग तसेच दक्षिण पूर्व अरबी समुद्रात लक्षद्वीपजवळ असलेली हवेची द्रोणीय स्थितीची तीव्रता वाढली आहे. यामुळे राज्यात पुढील दोन दिवस वादळी वाऱ्यासह पाऊस पडणार आहे. दरम्यान, हवामान विभागाने राज्याच्या काही भागात येलो अलर्ट दिला आहे. कोकण मराठवाड्यात पावसाचा जोर राहणार आहे.
राज्यात अनेक ठिकाणी अवकाळी पावसाने वादळी वाऱ्यासह दक्षिणपूर्व अरबी समुद्रात लक्षद्वीपजवळ हवेची द्रोणीय स्थिती असून, 19 ऑक्टोबरपर्यंत त्याचे कमी दाबाच्या क्षेत्रात रूपांतर होणार आहे, असे हवामान विभागाने सांगितले आहे. कर्नाटक आणि केरळ किनारपट्टीला समांतर असे हे क्षेत्र निर्माण होणार आहे. त्याच्या प्रभावामुळे कोकण, गोवा किनारपट्टीवरील अनेक जिल्ह्यात गुरुवारी (दि.१६) आणि शुक्रवारी (दि.१७) विजांचा कडकडाट तसेच सोसाट्याच्या वार्यासह पाऊस पडणार आहे.
तसेच मराठवाड्यात देखील गुरुवारी वादळी पावसाची शक्यता आहे. बुधवारी सायंकाळी राज्याच्या अनेक भागात पाऊस झाला. अरबी समुद्रातील स्थितीमुळे केरळ तसेच तामिळनाडूमध्ये पुढील दोन दिवस ऑरेंज अलर्ट देण्यात आला आहे.
येत्या 24 तासांत मान्सून संपूर्ण देशाचा निरोप घेणार आहे. त्यापाठोपाठ ईशान्य मोसमी वारे दक्षिणेकडे प्रवेश करतील, असा अंदाज वर्तविण्यात आला आहे.