पिंपरी : पुढारी वृत्तसेवा : स्पा सेंटरवर छापा मारून पोलिसांनी मिझोराम राज्यातील एक आणि महाराष्ट्रातील चार अशा पाच तरुणींची वेश्या व्यवसायातून सुटका केली. अनैतिक मानवी वाहतूक प्रतिबंधक विभागाने गुरुवारी (दि. 17) पिंपळे सौदागर येथील काटेवस्ती येथे ही कारवाई केली. स्पा मॅनेजर शाकीर समीरउद्दीन अहमद (26, रा. पिंपळे सौदागर. मूळ रा. आसाम) याला पोलिसांनी अटक केली आहे. त्याच्यासह पांडे चंकी धर्मेंद्र (22, रा. काळेवाडी), मंगेश भगवान जाधव (35, रा. हिंजवडी) यांच्या विरोधात गुन्हा दाखल करण्यात आला आहे. याप्रकरणी महिला पोलिस हवालदार सुधा टोके यांनी सांगवी पोलिस ठाण्यात फिर्याद दिली आहे.
वरिष्ठ पोलिस निरीक्षक देवेंद्र चव्हाण यांनी दिलेल्या माहितीनुसार, आरोपी शाकीर अहमद हा काटेवस्ती येथे स्पा सेंटर चालवत होता. तसेच, त्याने काही तरुणींना पैशांचे आमिष दाखवून स्पा सेंटरमध्ये वेश्या व्यवसायासाठी प्रवृत्त केल्याची माहिती अनैतिक मानवी वाहतूक प्रतिबंधक विभागाला मिळाली. त्यानुसार, पोलिसांनी स्पा सेंटरवर बनावट गिर्हाईक पाठवून माहितीची खातरजमा केली. त्यामध्ये स्पा सेंटरमध्ये वेश्याव्यवसाय सुरू असल्याची खात्री झाली. त्यानुसार, पोलिसांनी स्पा सेंटरवर छापा मारून पाच तरुणींची सुटका केली. यामध्ये मिझोराम येथील एक तर चार तरुणी महाराष्ट्रातील आहेत.
स्पा सेंटरच्या जवळच दोन रुग्णालये आणि एक शाळा आहे. रुग्णालये आणि शाळांच्या बाजूला हा प्रकार सुरू असल्याचे फिर्यादीत नमूद करण्यात आले आहे. या कारवाईमध्ये रोख रक्कम, मोबाईल फोन, पेटीएम स्कॅनर आणि इतर साहित्य असा 11 हजार 30 रुपयांचा मुद्देमाल जप्त करण्यात आला आहे. ही कारवाई पोलिस उपायुक्त (गुन्हे) स्वप्ना गोरे, सहायक पोलिस आयुक्त (गुन्हे) डॉ. प्रशांत अमृतकर यांच्या मार्गदर्शनाखाली अनैतिक मानवी वाहतूक प्रतिबंधक विभागाचे पोलिस निरीक्षक देवेंद्र चव्हाण, उपनिरीक्षक प्रदीपसिंग सिसोदे, धैर्यशिल सोळंके, विजय कांबळे, पोलिस अंमलदार सुधा टोके, मारुती करचुंडे, सागर सूर्यवंशी, वैष्णवी गावडे, रेश्मा झावरे यांनी केली आहे.