राहू: राहू (ता. दौंड) येथील सोनवणेमळा परिसरात शुक्रवारी (दि. २५) मध्यरात्री एकच्या सुमारास चोरट्यांनी धुमाकूळ घातला. चोरट्यांनी थेट नागरिकांच्या घरांना बाहेरून कड्या लावून दहशत निर्माण केली आणि रात्री दोनच्या सुमारास एक मोटारसायकल चोरून नेली.
यासह समतानगर येथेही एका घरात चोरी केल्याची माहिती मिळत आहे. या वाढत्या चोऱ्यांमुळे परिसरात भीती व संतापाचे वातावरण पसरले आहे. यापूर्वीही मागील आठवड्यात येथील नीलकंठ ज्वेलर्स हे दुकान फोडण्याचा प्रयत्न केला होता.
राहू परिसरात अनेकदा चोऱ्या झाल्यामुळे नागरिक भयभीत झाले आहेत. शेतात गेले तर बिबट्या आणि रात्री चोरट्यांच्या धुमाकुळामुळे जगण्याचा प्रश्न निर्माण झाल्याची भावना नागरिक व्यक्त करीत आहेत. यवत पोलिसांनी या गंभीर प्रकाराची दखल घेऊन राहू आणि सोनवणेमळा परिसरात रात्रीची गस्त तत्काळ वाढवावी, अशी मागणी रामभाऊ सोनवणे यांनी केली आहे.