पुणे : पुणे, पिंपरी-चिंचवडसह संपूर्ण जिल्ह्यात सोमवारपासून जोरदार पावसाला सुरुवात झाली आहे. राजगुरुनगर ७७.५, तर माळीण येथे ४३.५ मि.मी. पावसाची नोंद झाली, तर घाटमाथ्यावर यंदाच्या हंगामातील पहिला मुसळधार पाऊस झाल्याने सरासरी १०० ते १६० मि.मी.पेक्षा जास्त पावसाची प्रथमच नोंद झाली.
जिल्ह्यात काही दिवसांपासून पाऊसच नव्हता. त्यामुळे शेतकरी आणि सामान्य नागरिकही चिंतेत होते. पाऊस कधी पडतो याचीच सर्वजण आतुरेने वाट पाहात होते. मात्र, रविवारपासून जिल्ह्यातील काही भागांत पावसाला सुरुवात झाली.
राजगुरुनगर भागात सलग दुसऱ्या दिवशी ७० मि. मी.पेक्षा जास्त पाऊस झाला, तर उर्वरित तालुक्यात २० ते ४० मि.मी. पावसाची नोंद झाली. घाटमाथ्यावर यंदाच्या हंगामातील पहिल्या मुसळधार पावसाने बहार आणली. लोणावळासह सर्वच भागात १०० ते १६०मि.मी. पावसाची नोंद झाली.
राजगुरुनगर ७७.५, माळीण ४३.५, डुडुळगाव ३६.५, नारायणगाव ३६, बारामती २२.४, दापोडी २२, दौंड २१, निमगिरी १८.५, शिवाजीनगर ११.८, शिरुर ६, बालेवाडी ५, चिंचवड २, पाषाण ०.५. गिरीवन ०.५
लोणावळा १६०, शिरगाव ६०, वळवण १२५, डुंगरवाडी १५८, कोयना १२५, ताम्हिणी १२५