पुणे: शहरात शुक्रवारी झालेल्या मुसळधार मान्सूनपूर्व पावसाने शहराचा पारा 40 अंशांवरून थेट 34.7 अंशांवर आला आहे. पारा तब्बल 7 अंशांनी खाली आल्याने मे महिन्यातील हे नीचांकी कमाल तापमान ठरले. दरम्यान, रविवार आणि सोमवारी शहराला मुसळधार पावसाचा यलो अलर्ट देण्यात आला आहे.
शुक्रवारी शहरातील हडपसर, एनडीए भागात 30 मि.मी., तर चिंचवड भागात 60 मि.मी. पावसाची नोंद झाली. तसेच शिवाजीनगर, पाषाण, लोहगाव शहरातील मध्यवस्ती आणि उपनगरांत सरासरी 13 ते 15 मि.मी. पाऊस पडल्याने रस्त्यांवर पूर आला होता. त्यामुळे शहराचे कमाल तापमान 40 अंशांवरून 34.7 अंशांवर खाली आले होते. मे महिन्यात शहराचे कमाल तपामान प्रथमच इतके खाली आले आहे.
शहरात बाष्पयुक्त वाऱ्यांचा प्रभाव
शहरात शुक्रवारी झालेल्या पावसाने बहार आणली. कमाल तापमानात 7 ते 8 अंशांनी घट झाली असून, कमाल, किमान तापमानात खूप कमी अंतर झाले आहे. शहरात बाष्पयुक्त वाऱ्यांचा प्रभाव असून, वेग ताशी 30 ते 35 कि.मी. आहे. त्यामुळे रविवारी आणि सोमवारी (दि. 23 आणि 24 मे) शहराला मुसळधार पावसाचा इशारा देण्यात आला आहे.