Son Attacks Mother
पुणे : कौटुंबिक वादातून मुलाने 80 वर्षीय आईवर चाकूने वार केल्याची धक्कादायक घटना शनिवार पेठेतील मेहुणपुरा परिसरात शनिवारी (दि.6) रात्री घडली. याप्रकरणी विश्रामबाग पोलिसांनी 65 वर्षीय मुलाला आईच्या खुनाचा प्रयत्न केल्याप्रकरणी अटक केली आहे.
अविनाश पांडुरंग साप्ते (वय 65, रा. मेहुणपुरा, शनिवार पेठ) असे अटक केलेल्याचे नाव आहे. तर कुसुम साप्ते (वय 80) असे गंभीर जखमी झालेल्या ज्येष्ठ महिलेचे नाव आहे. त्यांना उपचारासाठी ससून रुग्णालयात दाखल केले आहे. याबाबत अविनाश साप्ते यांचा भाचा आशिष अशोक समेळ (वय 45, रा. मेहुणपुरा, शनिवार पेठ) यांनी विश्रामबाग पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपी अविनाश, त्याची आई कुसुम आणि फिर्यादी आशिष हे शनिवार पेठेतील मेहुणपुरा भागातील एका सोसायटीत राहायला आहेत. संपत्तीवरून त्यांच्यात वाद सुरू आहे. यापूर्वी त्यांच्यात वाद झाले होते. अविनाश साप्ते शनिवारी (दि.6 सप्टेंबर) रात्री दारू पिऊन घरी आला. त्यांनी आई कुसुम साप्ते यांच्याशी वाद घातला. त्यांचा चेहरा आणि डोक्यावर चाकूने वार केले. मुलाने केलेल्या हल्ल्यात त्या गंभीर जखमी झाल्या. आजीला वाचविण्यासाठी आशिष समेळ यांनी भांडणात मध्यस्थी केली. तेव्हा अविनाश यांनी त्याच्यावर चाकूने वार केला. या घटनेची माहिती मिळताच पोलिसांनी घटनास्थळी धाव घेतली. अविनाश साप्ते यांना अटक केली. सहायक पोलिस निरीक्षक कारके तपास करत आहेत.