पुणे: कोथरूडमधील गुंड गजा ऊर्फ महाराज ऊर्फ गजानन पंढरीनाथ मारणे आणि त्याच्या साथीदारांविरुद्ध पोलिस आयुक्त अमितेश कुमार यांनी महाराष्ट्र संघटित गुन्हेगारी नियंत्रण कायद्यान्वये (मकोका) कारवाई करण्याचे आदेश दिले. मागील आठवड्यात कोथरूडमध्ये संगणक अभियंता भाजपचे कार्यकर्ते देवेंद्र जोग यांना गजा मारणे टोळीतील गुंडांनी मारहाण केल्याची घटना घडली. या घटनेची गंभीर दखल घेत अमितेश कुमार यांनी हा कारवाईचा बडगा उगारला आहे.
मारणेसह साथीदारांच्या मालमत्तांची माहिती पोलिसांकडून संकलित करण्यात येत असून, ते वापरत असलेल्या वाहनांची माहिती प्रादेशिक परिवहन विभागाकडून घेण्यात आली आहे, अशी माहिती पोलिस आयुक्त अमितेश कुमार यांनी सोमवारी पत्रकारांशी बोलताना दिली. दरम्यान, गजा मारणेविरुद्ध करण्यात आलेली ही पाचवी ’मकोका’ची कारवाई आहे,
तर त्याच्यावर आत्तापर्यंत 27 गुन्हे दाखल आहेत. पुणे श्रमिक पत्रकार संघाकडून पोलिस आयुक्त अमितेश कुमार यांच्याशी वार्तालाप कार्यक्रमाचे आयोजन सोमवारी (दि. 24) करण्यात आले होते. या कार्यक्रमात कोथरूडमधील संगणक अभियंता देवेंद्र जोग यांना बुधवारी सायंकाळी मारणे टोळीतील गुंडांनी मारहाण केल्यानंतर सुरुवातीला पोलिसांनी आरोपीविरुद्ध मारहाणीच्या कलमान्वये गुन्हा दाखल केला.
सुरुवातीला पोलिसांनी कारवाई करताना किरकोळ मारहाणीचा गुन्हा दाखल केला होता, असा प्रश्न उपस्थित करण्यात आल्यानंतर पोलिस आयुक्त अमितेश कुमार यांनी कोथरूडमधील मारणे टोळीची दहशत मोडीत काढणार असून, त्यादृष्टीने कारवाई करण्यात येत असल्याचे पत्रकारांशी बोलताना सांगितले.
कोथरूडमधील भेलकेनगर परिसरात 19 फेब्रुवारीला दुचाकीस्वार संगणक अभियंता देवेंद्र जोग यांना मारणे टोळीतील गुंडांनी बेदम मारहाण केल्याची घटना घडली होती. त्यानंतर पोलिस आयुक्तांनी याप्रकरणी कठोर कारवाईचे आदेश कोथरूड पोलिसांना दिले होते.
पोलिसांनी मारणे टोळीतील गुंड ओम तीर्थराम धर्मजिज्ञासू (वय 35), किरण कोंडिबा पडवळ (वय 31), अमोल विनायक तापकीर (वय 35, तिघे रा. शास्त्रीनगर, कोथरूड) यांना अटक केली. त्यांच्याबरोबर असलेला साथीदार श्रीकांत ऊर्फ बाब्या संभाजी पवार पसार झाला आहे. आरोपींविरुद्ध गंभीर गुन्ह्यांची नोंद आहे. देवेंद्र पुरुषोत्तम जोग (वय 33, रा. मयूर कॉलनी, कोथरूड) यांनी याबाबत फिर्याद दिली आहे.
पुणेकरांनो, दहशत मोडीत काढण्यासाठी तक्रार करा
कोथरूड परिसरातील गजा मारणे टोळीची दहशत मोडीत काढण्यात येणार आहे. नागरिकांनी मारणे टोळीविरुद्ध तक्रार करावी. त्यासाठी गुन्हे शाखेत एक कक्ष सुरू करण्यात येणार आहे. गुन्हे शाखेचे पोलिस उपायुक्त निखिल पिंगळे या कक्षाची जबाबदरी सांभाळणार आहेत. तक्रार करणार्या नागरिकांचे नाव गोपनीय ठेवण्यात येणार असल्याचे पोलिस आयुक्तांनी म्हटले आहे.
गजा मारणेही आरोपी
संगणक अभियंता देवेंद्र जोग यांना मारहाण केल्याप्रकरणी तिघांना अटक केली आहे. हे आरोपी गजा मारणे टोळीशी संबंधित असल्यामुळे गजाविरुद्ध कारवाई करण्यात येणार असून, पोलिसांनी मारणेच्या पौड रस्त्यावरील घराची झडती घेतली.
गुन्हे शाखेच्या पथकाकडून 74 ठिकाणी झडती घेण्यात आली. मारणेसह साथीदारांविरुद्ध ’मकोका’ कारवाई करण्यात येणार आहे. त्यादृष्टीने पोलिसांकडून तपास करण्यात येत आहे. पोलिसांनी कारवाईसंदर्भातील कागदपत्रांची पूर्तता केली आहे. मोबाईलचे तांत्रिक विश्लेषण, सीसीटीव्ही चित्रीकरण तपासण्यात येत आहे, असे पोलिस आयुक्त अमितेश कुमार यांनी सांगितले.
गुंडांनी मुख्य प्रवाहात यावे. चांगली वर्तणूक ठेवल्यास त्यांच्यावर कारवाईचा प्रश्नच येत नाही. मात्र, जे शहरातील कायदा व सुव्यवस्थेला गालबोट लावत आहेत, अशा गुंडांविरुद्ध पोलिसांकडून कठोर कारवाई करण्यात येणार आहे.- अमितेश कुमार, पोलिस आयुक्त