पुणे : मुलांना लहानपणापासून वाहतुकीचे नियम पाळण्याची सवय लागावी, यासाठी पुणे महापालिकेने औंध येथील ब्रेमेन चौकात उभारलेले चिल्ड्रन ट्रॅफिक पार्क (वाहतूक उद्यान) महापालिकेच्या शिक्षण विभागाच्या अनास्थेमुळे गेल्या तीन- साडेतीन महिन्यांपासून बंद आहे. महापालिकेच्या शाळांमधील विद्यार्थ्यांना ट्रॅफिक पार्कमध्ये पाठवण्यासाठी बसची व्यवस्था करून आणि वारंवार पत्र देऊनही शिक्षण अधिकार्यांकडून दुर्लक्ष केले जात असल्याचे सूत्रांनी सांगितले आहे.
वाहतुकीचे विविध नियम काय आहेत, नियमांची चिन्हे, त्या चिन्हांचा उपयोग, अर्थ काय अशा विविध प्रश्नांची उत्तरे लहान मुलांना होण्यासाठी महापालिकेच्या पथ विभागाने या औंध येथील ब्रेमेन चौकात ट्रॅफिक पार्क साकारले आहे. लहान मुलांना सोप्या पद्धतीने नियम कळतील, अशा पद्धतीने या ठिकाणी सर्व व्यवस्था करण्यात आली आहे. यामध्ये पहिल्या भागात पहिल्या टप्प्यात रस्त्यावरील दुहेरी मार्गिका, सायकल मार्ग, पार्किंग व्यवस्था, चौक, स्वतंत्र सिग्नल, पादचारी क्रॉसिंग, तर दुसर्या भागात वाहतूक सुरक्षेसंदर्भातील माहिती चिन्हे, मराठी-इंग्रजीमध्ये माहिती, वाहतुकीसंबंधी 2 ते 3 मिनिटांचा माहितीपट आदींचा समावेश आहे.
हा प्रकल्प पूर्ण क्षमतेने सुरू झाल्यापासून सप्टेंबर 2022 पासून जुलै 2023 पर्यंत दहा महिन्यांत 8 हजार 150 जणांनी भेट दिली आहे. यामध्ये महापालिकेच्या 43 शाळा, खासगी 30 शाळा आणि जिल्हा परिषदेच्या 02 अशा 75 शाळांचे 7 हजार 296 विद्यार्थी, 611 शिक्षक आणि 243 विद्यार्थांचे पालकांचा समावेश आहे. विद्यार्थी शाळेतून पार्कपर्यंत आणण्यासाठी आणि पुन्हा शाळेत सोडण्यासाठी बसची व्यवस्था करण्यात आलेली आहे. मात्र, मागील काही महिन्यांपासून महापालिकेच्या शाळांमधील विद्यार्थी पाठवणे बंद केले आहे. विद्यार्थी पाठवण्यासंदर्भात पथ विभागाने शिक्षण विभागाशी वारंवार पत्रव्यवहार केला आहे, परिपत्रक काढले आहे. मात्र, त्याकडे शिक्षण विभागाकडून दुर्लक्ष केले जात असल्याने लाखो रुपये खर्च करून साकारलेले ट्रॅफिक पार्क बंद आहे.
हेही वाचा