Draft ward structure civic elections
पुणे: राजकीय नेत्यांचे आणि कार्यकर्त्यांचे लक्ष लागलेल्या महापालिका निवडणुकीसाठीच्या प्रारूप प्रभाग रचनेचा आराखडा तयार झाला असून, तो महापालिका आयुक्तांकडे अंतिम स्वाक्षरीसाठी सादर झाला आहे. येत्या सोमवारी (दि.4) प्रारूप रचनेचा आराखडा शासनाला सादर होणार असल्याचे प्रशासनाकडून सांगण्यात आले.
राज्यातील रखडलेल्या स्थानिक स्वराज्य संस्थांच्या निवडणुका चार महिन्यांत घेण्याचे आदेश सर्वोच्च न्यायालयाने सरकारला दिले आहेत. त्यानुसार महापालिका निवडणुकीसाठी शासनाने चार सदस्यीय प्रभाग रचना करण्याचा निर्णय घेतला असून, त्यानुसार महापालिका प्रभाग रचना करण्यासाठी वेळापत्रक दिले होते. (Latest Pune News)
त्यानुसार येत्या दि. 5 जूनला प्रारूप प्रभाग रचनेचा आराखडा शासनाकडे सादर करण्याची अंतिम मुदत आहे. त्यानुसार महापालिकेने 11 जूनपासून प्रभाग रचनेचा आराखडा तयार करण्याचे काम सुरू केले होते. त्यानुसार प्रत्यक्ष जागेवर हद्द तपासून प्रगणक गटानुसार ही रचना करण्याचे काम गेल्या जवळपास दीड महिन्यापासून सुरू होते.
त्यानुसार नैसर्गिक हद्दी कायम ठेवून प्रभाग रचना निश्चित करण्यात आली आहे. शुक्रवारी स्वतः आयुक्त नवल किशोर राम यांनी महापालिकेच्या सावरकर भवन येथील निवडणूक कार्यालयाला भेट देऊन प्रभाग रचनेच्या कामाची माहिती घेतली.
दरम्यान या आराखड्यावर प्रशासनाकडून नेमण्यात आलेल्या समितीकडून त्यानंतर शिक्कामोर्तब करण्यात आला असल्याचे सांगण्यात आले. त्यानुसार अंतिम स्वाक्षरीसाठी हा आराखडा आयुक्त राम यांच्याकडे सायंकाळी सादर करण्यात आला आहे. आयुक्तांची स्वाक्षरी झाल्यानंतर येत्या सोमवारी नगर विकास विभागाकडे हा आराखडा सादर केला जाणार आहे, अशी माहिती महापालिका अधिकार्यांकडून देण्यात आली.