पुणे : महापालिकेच्या महापौरपदासाठीची आरक्षण सोडत उद्या गुरुवारी मुंबईत निघणार आहे. त्यामुळे महापौरपद नक्की कोणत्या प्रवर्गाकडे जाणार, याचे चित्र स्पष्ट होणार असून, त्यानुसार महापालिका प्रशासनाने दि. 2 फेबुवारीला निवडणूक घेण्याचे नियोजन केले आहे. त्यानुसार गुरुवारी विभागीय आयुक्तांना पत्र देण्यात येणार आहे.
महापालिका निवडणुका झाल्यानंतर आता महापौरपदासह अन्य समित्यांच्या निवडीची उत्सुकता लागली आहे. मात्र, यावर्षी महापालिका निवडणुकीआधी महापौरपदाचे आरक्षण जाहीर झाले नसल्याने महापौरपदाची निवडणूक अद्याप जाहीर झालेली नाही. आज मुंबईत पुण्यासह राज्यातील 29 महापालिकांच्या महापौरपदाचे आरक्षण जाहीर होणार आहे. त्यातून पुढील पहिल्या अडीच वर्षांसाठी महापौरपद कोणत्या प्रवर्गासाठी राखीव होणार आहे, हे स्पष्ट होणार आहे.
दरम्यान, आरक्षण सोडतीनंतर महापौरपदाच्या निवडणुकीचा मार्ग मोकळा होणार आहे. त्यानुसार पालिका प्रशासनाने निवडणुकीची तयारी सुरू केली आहे. दि. 2 फेबुवारीला निवडणूक घेण्याचे प्रशासनाचे नियोजन आहे. आज याबाबत विभागीय आयुक्तांना पत्र देण्यात येणार आहे. त्यानुसार विभागीय आयुक्तांकडून महापौरपदाच्या निवडणुकीचा कार्यक्रम जाहीर होणार आहे. दि. 5 फेबुवारीला जि. प. आणि पंचायत समितीच्या निवडणुका होणार असल्याने त्यापूर्वीच महापौरपदाची निवडणूक घेण्याचे नियोजन असल्याचे प्रशासनाकडून स्पष्ट करण्यात आले.