पुणे: संत ज्ञानेश्वर महाराज आणि जगद्गुरू तुकाराम महाराज यांच्या पालख्यांच्या प्रस्थानाच्या पार्श्वभूमीवर सोलापूर महामार्ग काही काळासाठी बंद केल्याने रविवारी गुलटेकडी मार्केट यार्डातील तरकारी विभागात पालेभाज्यांची आवक घटली. रविवारी बाजारात राज्यासह परराज्यातून 80 ट्रकमधून शेतमाल विक्रीसाठी दाखल झाला.
गत आठवड्याच्या तुलनेत फळभाज्यांची आवक दहा ट्रकने घटली. बाजारात दाखल झालेल्या मालाच्या तुलनेत मागणी जास्त राहिल्याने हिरवी मिरची आणि गाजराच्या भावात पाच ते दहा टक्क्यांनी वाढ झाली. उर्वरित सर्व फळभाज्यांची आवक -जावक कायम असल्याने गत आठवड्यातील वाढलेले दर टिकून होते.(Latest Pune News)
परराज्यांतून झालेल्या आवकमध्ये कर्नाटक येथून कोबी 3 ते 4 टेम्पो, आंध्र प्रदेश आणि तामिळनाडू येथून शेवगा 3 ते 4 टेम्पो, इंदोर येथून गाजर 9 ते 10 टेम्पो, कर्नाटक आणि हिमाचल प्रदेश येथून घेवडा 3 ते 4 टेम्पो, हिमाचल प्रदेश 3 ते 4 टेम्पो मटार, आंध्रप्रदेश आणि तामिळनाडू येथून कैरी 3 ते 4 टेम्पो, मध्यप्रदेश येथून लसूणाची सुमारे 8 ते 10 टेम्पो तर इंदौर, आग्रा, स्थानिक भागातून बटाटा 30 ते 35 टेम्पो इतकी आवक झाली होती.
स्थानिक भागातून झालेल्या आवकमध्ये सातारी आले सुमारे 500 ते 550 गोणी, भेंडी 5 ते 6 टेम्पो, गवार 3 ते 4 टेम्पो, टोमॅटो 7 ते 8 हजार क्रेट, हिरवी मिरची 4 ते 5 टेम्पो, काकडी 7 ते 8 टेम्पो, फ्लॉवर 10 ते 12 टेम्पो, कोबी 5 ते 6 टेम्पो, ढोबळी मिरची 8 ते 10 टेम्पो, भुईमूग शेंग 100 ते 125 गोणी, तांबडा भोपळा 10 ते 12 टेम्पो, कांदा सुमारे 30 टेम्पो इतकी आवक झाली होती, अशी माहिती मार्केट यार्डमधील ज्येष्ठ अडते विलास भुजबळ यांनी दिली.
कोथिंबिरीच्या भावात घट, उर्वरित स्थिर
पावसाने उघडीप दिल्याने कोथिंबिरीची आवक मोठ्या प्रमाणात वाढली आहे. त्यामुळे घाऊक बाजारात जुडीच्या भावात तब्बल 13 रुपयांनी घट झाली आहे. आता दर्जानुसार बाजारात 5 ते 12 रुपये भाव मिळत आहे. उर्वरित पालेभाज्यांची घटलेली आवक कायम आहे. त्या तुलनेत मागणी कमी आहे.
त्यामुळे उर्वरित पालेभाज्यांचे भाव मागील आठवड्याच्या तुलनेत स्थिर असल्याची माहिती व्यापार्यांनी दिली. मार्केट यार्डातील घाऊक बाजारात रविवारी (दि.22) दीड लाख जुडी आवक झाली. हीच आवक मागील आठवड्यात 90 हजार जुडी होती. मेथीची 20 हजार जुडी आवक झाली. ही आवक मागील आठवड्याच्या तुलनेत स्थिर असल्याचे व्यापार्यांनी सांगितले.