पुणे: शहरातील गणेश विसर्जन मिरवणुकीवर शुक्रवारी दिवसभर मोठ्या पावासाची शक्यता नाही. मात्र, हलका पाऊस सायंकाळी हजेरी लावू शकतो, असा अंदाज हवामान विभागाने वर्तवला आहे.
परतीचा मान्सून सध्या गुजरात आणि मध्य प्रदेशात पोहोचला आहे. तेथून तो महाराष्ट्राकडे येत आहे. मात्र, मान्सून कमजोर स्थितीत असल्याने परतीच्या पावसाचा जोर कमी आहे. त्यामुळे पुणे शहरातील गणेश विसर्जन मिरवणुकीवर शुक्रवारी पावसाची शक्यता कमीच आहे.
सायंकाळच्या वेळी हलक्या सरी हजेरी लावून जातील, असा अंदाज आहे. दिवसा कडक ऊन राहणार असल्याने नागरिकांनी टोपी, छत्री रुमाल, पाण्याची बाटली सोबत ठेवावी, असा सल्ला हवामान शास्त्रज्ञांनी दिला आहे. शनिवारपासून (२६ सप्टेंबर) मात्र शहरातील पावसाची शक्यता पूर्ण कमी होत आहे.