Pune Crime News: पहिलं लग्न झालेलं असतानाही आपण अविवाहित असल्याचं भासवून एका तरुणाने डॉक्टर युवतीला लग्नाचं आमिष दाखवलं. त्यानंतर वेळोवेळी तिच्याकडून तब्बल दहा लाख रुपये उकळले. नंतर तरुणाने डॉक्टरला आपलं लग्न झालं असल्याचं सांगितलं. इतकंच नाही, तर आपली पत्नी गर्भवती असल्याचे त्याने सांगितले.
या गोष्टीचा जबर मानसिक धक्का बसल्याने डॉक्टर तरुणीने आत्महत्या करत आपलं आयुष्य संपवल्याची धक्कदायक घटना घडली आहे. विषारी औषधं पिऊन तरुणीने स्वतःच्याच क्लिनिकमध्ये आत्महत्या केली.
पुणे शहरातील बिबवेवाडी परिसरात घडलेल्या या घटनेने एकच खळबळ उडाली आहे. या प्रकरणी कुलदीप सावंत याच्यावर गुन्हा दाखल करण्यात आला आहे. याबाबत तरुणीचे पिता यांनी बिबवेवाडी पोलिसात फिर्याद दिली आहे. ही घटना बिबावेवाडीतील पीएमटी कॉलनीत सात जानेवारी रोजी घडली होती.
पोलिसांनी दिलेल्या माहितीनुसार, आरोपीचे लग्न झालेले असतानाही जीवनसाथी डॉट कॉम या संकेतस्थळावर लग्नासाठी नोंदणी केली. तिथेच तो फिर्यादींना भेटला. मात्र त्याचे वागणे पित्याला पटले नसल्याने त्याला नकार कळवला होता. मात्र त्यानंतर त्याने थेट तरुणीशी संपर्क साधला.
तरुणी बीएमएचएस झाली असून तिचे क्लिनिक आहे. कुलदीपने तरुणीला प्रेमाच्या जाळ्यात ओढले. वेगवेगळी कारणे सांगून त्याने तिच्याकडून तब्बल दहा लाख रुपये उकळले. लग्नाचा विषय काढला असता त्याने आपले लग्न झाले असून पत्नी गर्भवती असल्याचे सांगितले.
हे ऐकून तरुणीला मोठा धक्का बसला. त्यानंतर तिने वेळोवेळी आपले दहा लाख रुपये परत करण्याची मागणी केली. मात्र तो रक्कम परत देण्यासाठी टाळाटाळ करत होता. याचा मानसिक तणाव सहन न झाल्याने तरुणीने चिठ्ठी लिहून क्लिनिकमध्येच विषारी औषध प्राशन करुन आत्महत्या केली.