पुणे: अनैतिक संबंधांना विरोध केल्याच्या कारणातून जमीन खरेदी-विक्री करणार्या व्यावसायिकाला बेदम मारहाण करून त्याचा खून करण्यात आला. ही घटना कात्रज भागातील गुजरवाडी परिसरात घडली. मनोहर शिंदे (वय 46, रा. पवारनगर, गुजरवाडी रस्ता, मांगडेवाडी, कात्रज) असे खून झालेल्याचे नाव आहे.
याप्रकरणी भारती विद्यापीठ पोलिसांनी पसार झालेल्या दोघांना अटक केली आहे. रोहित ऊर्फ बुधाजी असोरे (वय 32), केशव असोरे (वय 26, दोघे रा. खोपडेनगर, गुजरवाडी, कात्रज) या दोघांना अटक केली आहे. (Latest Pune News)
पोलिसांनी दिलेल्या माहितीनुसार, मनोहर शिंदे यांच्या नात्यातील एका महिलेचे आरोपी रोहित याच्याशी अनैतिक संबंध होते. रोहित हा रिक्षा चालवायचा. त्यानंतर त्याने प्रवासी वाहने भाडेतत्त्वावर देण्याचा व्यवसाय सुरू केला. मनोहर यांनी अनैतिक संबंधांना विरोध केला होता. या कारणावरून त्यांच्यात यापूर्वी वाद झाला होता.
शुक्रवारी रात्री रोहित आणि त्याच्याबरोबर असलेले साथीदार कात्रज भागातील पवारनगर भागात आले. रोहित, केशव आणि साथीदारांनी शिंदे यांना लाथाबुक्क्यांनी बेदम मारहाण केली. त्यांच्या डोक्यात बांबू घातला. डोक्याला गंभीर दुखापत झाल्याने शिंदे यांना तातडीने खासगी रुग्णालयात दाखल करण्यात आले. उपचारांपूर्वीच त्यांचा मृत्यू झाला होता.
या घटनेची माहिती मिळताच भारती विद्यापीठ पोलिसांनी घटनास्थळी धाव घेतली. पसार झालेला आरोपी रोहित याला ताब्यात घेण्यात आले. त्याचा साथीदार केशवला बीडमधील गेवराई परिसरातून ताब्यात घेण्यात आले. दोघे आरोपी एकमेकांचे नातेवाईक आहेत. वरिष्ठ पोलिस निरीक्षक सावळाराम साळगावकर तपास करीत आहेत.