पिंपरी : चिंचवड पोटनिवडणुकीत मतदारांनी आपल्याला चांगला कौल दिला आहे. आपल्यासाठी संधी असतानाही त्याचे विजयात रुपांतर झाले नसले तरी खचून न जाता या निवडणुकीपेक्षाही अधिक जोमाने पुढील निवडणुकीच्या तयारी लागा, अशा सूचना राष्ट्रवादी काँग्रेसचे अध्यक्ष खासदार शरद पवार यांनी नाना काटे यांच्यासह पिंपरी-चिंचवड शहरातील राष्ट्रवादीच्या प्रमुख नेत्यांना दिल्या.
चिंचवड विधानसभेच्या पोटनिवडणुकीतील महाविकास आघाडीचे उमेदवार नाना काटे यांच्यासह राष्ट्रवादीचे शहराध्यक्ष अजित गव्हाणे, ज्येष्ठ नेते भाऊसाहेब भोईर, प्रदेश समन्वयक सुहास उभे, राष्ट्रवादी विद्यार्थीचे प्रदेशाध्यक्ष सुनील गव्हाणे, माजी नगरसेवक प्रभाकर वाघेरे, माजी आमदार उल्हास पवार यांनी शरद पवार यांची रविवारी (दि.5) भेट घेऊन निवडणुकीसंदर्भात चर्चा केली.
निवडणुकीतील सर्व बाबींची माहिती घेतल्यानंतर पवार यांनी उपस्थितांना मार्गदर्शन केले. ते म्हणाले की, महाविकास आघाडीसाठी सध्या अत्यंत सकारात्मक स्थिती आहे. येणार्या प्रत्येक निवडणुकीत आपण योग्य पद्धतीने नियोजन करून काम केल्यास विजय आपलाच असणार आहे. लोकांनाही आता बदल हवा असल्याने आपल्याला अत्यंत जबाबदारीने काम करावे लागणार आहे. पोटनिवडणुकीमध्ये झालेल्या चुकांमध्ये दुरुस्ती करून अधिक जोमाने येणार्या पिंपरी-चिंचवड महापालिका निवडणुकींच्या तयारीला आतापासून लागा. येत्या काही दिवसांत विरोधी पक्षनेते अजित पवार यांच्या उपस्थितीत एक आढावा बैठक घेऊयात, असे त्यांनी सांगितले.
पवारांनी घेतली माहिती
शरद पवार यांनी चिंचवड विधानसभेच्या पोटनिवडणुकीत प्रभागनिहाय माहिती घेतली. आपल्यासाठी परिस्थिती सकारात्मक असतानाही आपण कोठे कमी पडलो, यासह निवडणुकीतील बारकाव्यांबाबत माहिती घेतली. या वेळी नाना काटे यांच्यासह उपस्थित प्रमुख मान्यवरांनी संपूर्ण माहिती दिली.