पुणे; पुढारी वृत्तसेवा : सोलापूर-पुणे मार्गावर प्रवास करणार्या ट्रॅव्हलमध्ये चढून चार ते पाच जणांच्या टोळक्याने चालकाच्या मानेवार वार करून खुनाचा प्रयत्न करून आरोपी फरार झाले होते. याप्रकरणी गुन्हे शाखेच्या युनिट 6 ने दोघांना बेड्या ठोकल्या असून, एका अल्पवयीन मुलाला ताब्यात घेतले आहे. रोहित अरुण पवार (20), अनय संजय लोखंडे (20, रा. शिवमंदिराजवळ, गोंधळेनगर, हडपसर) अशी अटक झालेल्या दोघांची नावे आहेत.
गुन्हा केल्यानंतर आरोपी फरार झाले होते. त्यामुळे स्थानिक पोलिसांसह गुन्हेशाखेची पथके आरोपींचा शोध घेत होती. हद्दीमध्ये पेट्रोलिंग करत असताना पोलिस अंमलदार नितीन मुंढे यांना गुन्ह्यातील आरोपी हे हडपसर येथील उद्यानाशजारी मैदानात बसल्याचे समजले. त्यानंतर वरिष्ठ पोलिस निरीक्षक रजनीश निर्मल यांच्या मार्गदर्शनाखाली पथकाने घटनास्थळी धाव घेतली असता आरोपी त्यांना पाहून पळत असताना पकडले.
त्यातून इतर आरोपींचीही नावे निष्पन्न झाली. ही कारवाई पोलिस उपनिरीक्षक सुरेश जायभाय, भैरवनाथ शेळके, अंमलदार मच्छिंद्र वाळके, विठ्ठल खेडकर यांच्या पथकाने केली. दरम्यान, रोहित पवारला ताब्यात घेऊन चौकशी करण्यात आली. त्यात त्याने सांगितले की, त्याचा मित्र सूरज शिरसाठ हा 9 ऑक्टोबर रोजी ट्रॅव्हल्सने पुण्याकडे येत असताना. ट्रॅव्हल्स चालकाबरोबर सीटवर पाय ठेवण्यावरून भांडण झाले होते. ही बस कुंजीरवाडीजवळ आल्यानंतर प्रवासी उतरविल्यानंतर त्यांनी हा हल्ला केल्याचे तपासात समोर आले आहे.