मंचर : पुढारी वृत्तसेवा : मंचर (ता. आंबेगाव) येथे स्त्री जातीचे अर्भक बेवारस टाकून पळून गेलेली अर्भकाची आई आणि तिच्या मुलीला मंचर पोलिसांनी सीसीटीव्ही फुटेजच्या आधारे ओळखून अटक केली आहे . मंचर येथील छत्रपती संभाजी महाराज चौकातील कौटकर भेळ दुकानाशेजारील कचर्याच्या ढिगा-यात एका पिवळ्या रंगाच्या पिशवीमध्ये काळ्या कपड्यामध्ये 4 ते 5 दिवसांचे स्त्री जातीचे अर्भक मिळून आले. त्यानंतर त्या अर्भकास तत्काळ उपचारासाठी मंचर उपजिल्हा ग्रामीण रुग्णालय येथे दाखल करण्यात आले होते. घटनेचे गांभीर्य लक्षात घेता मंचरचे पोलिस निरीक्षक सतीश होडगर यांचे आदेशानुसार सहायक पोलिस निरीक्षक किरण भालेकर यांनी पोलिस सहकार्यांना त्या मार्गावरील सर्व सीसीटीव्ही यंत्रणा तपासण्याच्या सूचना दिल्या.
त्यानुसार पोलिसांनी अथक परिश्रम घेऊन तारा खंडू साळवे (वय 40, रा. एस. कॉर्नर मंचर, ता. आंबेगाव) आणि तिची मुलगी पूजा आकाश पवार (वय 19) या दोघींना ताब्यात घेतले. या दोघींनी गुन्ह्याची कबुली दिली असून हे अर्भक तारा यांचे असल्याचे त्यांनी सांगितले.
दरम्यान या अर्भकाला तातडीने रुग्णालयात पोहोचवून त्याचे प्राण वाचविणार्या रुग्णवाहिकाचालक गौरव बारणे आणि अमर बारवकर यांचा मंचर पोलिसांनी सत्कार केला.