पुणे; पुढारी वृत्तसेवा : महात्मा जोतिबा फुले संशोधन व प्रशिक्षण संस्था अर्थात महाज्योती संस्थेच्या वतीने ओबीसी, व्हीजेएनटी व एसबीसी प्रवर्गातील विद्यार्थ्यांना विविध उपक्रमांसाठी शिष्यवृत्ती देण्यात येते. परंतु राज्य शासनाच्या इतर मागास बहुजन कल्याण विभागाच्या वतीने महाज्योती संस्थेची अडवणूक करण्यात येत आहे. त्यामुळे संस्थेची स्वायत्तता धोक्यात आल्याचा आरोप करत संस्थेचे माजी संचालक प्रा. दिवाकर गमे यांनी आंदोलनाचा इशारा दिला आहे.
गमे यांनी दिलेल्या माहितीनुसार, राज्यातील आठ कोटी ओबीसी, व्हिजेएनटी व एसबीसी प्रवर्गातील विद्यार्थ्यांना महाज्योतीने मागील अडीच वर्षांच्या काळात मोफत प्रशिक्षण तसेच स्टायपेंड आणि फेलोशिप देणारे विविध प्रशिक्षण सुरू केले. आतापर्यंत महाज्योतीने 48 हजार विद्यार्थ्यांना विविध प्रशिक्षणाचा लाभ दिला आहे. तत्कालीन ओबीसी मंत्री व महाज्योतीचे अध्यक्ष विजय वडेट्टीवार यांनी महाज्योतीला संपूर्ण स्वायत्तता दिल्यामुळेच हे शक्य झाले. परंतु शिंदे-फडणवीस सरकारने महाज्योतीवरील अशासकीय संचालकांच्या नेमणुका रद्द केल्या. स्वायत्त असलेल्या महाज्योती संस्थेत मंत्रालयातील अधिकार्यांचा अवाजवी हस्तक्षेप सुरू होऊन तिची स्वायत्तता धोक्यात आली आहे.
माजी संचालकांच्या मागण्या
शासनाने 'महाज्योती'च्या 1200 पीएच.डी.च्या विद्यार्थ्यांच्या फेलोशिपवर प्रश्नचिन्ह निर्माण करून, संभ—म निर्माण केला आहे. महाज्योतीला लागू नसलेल्या विविध प्रश्नांची सरबत्ती करून, पीएच.डी. फेलोशिप घेणार्या विद्यार्थ्यांवर अन्याय केला आहे. त्यामुळे शासनाने नियमबाह्य आक्षेप तत्काळ मागे घ्यावेत. तसेच 20 एप्रिलपर्यंत पीएच.डी.धारक विद्यार्थ्यांच्या खात्यात त्यांची सहा महिन्यांची प्रलंबित फेशोशिप जमा करावी अन्यथा महाज्योती व शासनाच्या विरोधात, नागपूरला आंदोलन करण्यात येईल, असा इशारा गमे यांनी दिला आहे.