मंचर: निरगुडसर (ता. आंबेगाव) येथील दांगटवस्ती येथे शिकारीच्या शोधात मांजराचा पाठलाग करताना बिबट्या घराच्या दारात आला. ही घटना सोमवारी (दि. 30 जून) रात्री 8 वाजता घडली. घरात असलेले ज्येष्ठ दाम्पत्य यांनी जोरजोरात आरडाओरडा केल्याने बिबट्या दरवाजातूनच माघारी फिरल्याने हे दाम्पत्य थोडक्यात बचावले.
याबाबत सविस्तर माहिती अशी की, निरगुडसर दांगटवस्ती येथे सुरेश श्रीपती दांगट (वय 65) व त्यांची पत्नी ताराबाई (वय 60) हे राहतात. त्यांची मुले कामानिमित्त मुंबई या ठिकाणी असतात. सोमवारी रात्री 8 वाजेच्या दरम्यान दांगट दाम्पत्य घरात बसलेले असताना त्यांची पाळलेली दोन मांजरे घराबाहेर खेळत होती. (Latest Pune News)
घराशेजारी असलेल्या उसाच्या शेतातून शिकारीच्या शोधात आलेल्या बिबट्याने त्यांच्या मांजरांचा पाठलाग केला. त्यामुळे मांजरे घरात पळाली. त्याबरोबर बिबट्यादेखील मांजरांच्या मागे घराच्या दारापर्यंत आला.
सुरेश दांगट घरातून उठून बाहेर जाण्यासाठी निघाले असता ताराबाई यांनी त्यांना दरवाजात बिबट्या आहे, बाहेर जाऊ नका असे सांगत जोरजोरात आरडाओरडा केला, तसेच घरातील काठीने दरवाजावर जोरजोरात मारत मोठा आवाज केल्याने बिबट्या निघून गेला; मात्र घडलेल्या प्रकाराने दांगट दाम्पत्य खूप घाबरले होते. देवाची कृपा म्हणून आम्ही वाचलो असे ताराबाई दांगट यांनी सांगितले. याबाबत माजी उपसरपंच आनंदराव वळसे पाटील यांनी वन विभागाच्या अधिकार्यांना माहिती दिली.
वनरक्षक अश्विनी डफळ, वन कर्मचारी दशरथ मेंगडे यांनी घटनास्थळी भेट देत पाहणी केली आहे. या ठिकाणी पिंजरा लावावा, अशी मागणी येथील प्रगतीशील शेतकरी शिवाजी दांगट, कारभारी दांगट, बाळासाहेब दांगट आणि विशाल दांगट यांनी केली आहे.
यापूर्वी अनेकदा बिबट्याचे हल्ले
दांगटवस्ती या परिसरात बिबट्याचे वास्तव्य असून दोन दिवसापूर्वी सुरेश दांगट यांच्या घराच्या पाठीमागे असलेल्या शेतातून पहाटे सहा वाजता बिबट्या जाताना ताराबाई दांगट यांनी पाहिला होता. या अगोदरही सुरेश दांगट यांची दोन पाळीव कुत्री, एक कालवड बिबट्याने फस्त केली असून शेजारी राहणारे शिवाजी दांगट यांचे तीन पाळीव कुत्री तर पुष्पाबाई दांगट यांचा एक पाळीव कुत्रा बिबट्याने आतापर्यंत ठार केला आहे.