पुणे; पुढारी वृत्तसेवा : कुकडी डाव्या कालव्याचे रब्बीमधील आवर्तन 1 जानेवारी 2023 रोजी तर घोड डावा व उजव्या कालव्याचे पहिले आवर्तन 10 जानेवारी 2023 रोजी सोडण्याचे निश्चित करण्यात आले. कुकडी प्रकल्प व घोड प्रकल्प कालवा सल्लागार समितीची बैठक पालकमंत्री चंद्रकांत पाटील यांच्या अध्यक्षतेखाली विधानभवन येथे झाली, त्यावेळी हा निर्णय घेण्यात आला. या बैठकीस महसूलमंत्री राधाकृष्ण विखे- पाटील, आमदार दिलीप वळसे पाटील, अशोक पवार, रोहित पवार, अतुल बेनके, विभागीय आयुक्त सौरभ राव, जिल्हाधिकारी डॉ. राजेश देशमुख, महाराष्ट्र कृष्णा खोरे विकास महामंडळाचे कार्यकारी संचालक अतुल कपोले, मुख्य अभियंता (वि. प्र.) हेमंत धुमाळ, अधीक्षक अभियंता संतोषकुमार सांगळे आदी उपस्थित होते.
डिंभे बोगद्याच्या कामासाठी सुमारे 350 कोटी रुपयांची आवश्यकता असल्याचे या वेळी सांगण्यात आले. त्यानुसार तातडीने या कामाचा प्रस्ताव करण्याचे निर्देश मंत्री चंद्रकांत पाटील आणि विखे- पाटील यांनी दिले. धरणातून कालव्यात सोडण्यात आलेले पाणी अपेक्षित क्षमतेने कालव्याच्या शेवटच्या क्षेत्राला (टेल) मिळावे म्हणून गळती रोखण्यासाठी महामंडळाच्या अधिकार्यांनी उपाययोजना कराव्यात. नदीवरील तसेच कालव्यावरील अनियंत्रित व अनधिकृत पाणीउपशावर नियंत्रण आणावे.
या प्रकल्पातून पुणे, अहमदनगर आणि सोलापूर जिल्ह्यातील शेती, पिण्यासाठी आणि उद्योगांना पाणी दिले जाते. त्यामुळे सर्व घटकांना समन्यायी पद्धतीने पाणी मिळेल याकडे लक्ष द्यावे, अशा सूचना मंत्र्यांनी दिल्या. डिंभे डावा कालव्याच्या दुरुस्तीसाठी बिगर सिंचनामधून 30 कोटी खर्चून काम करण्यात आले आहे. या वर्षी अजून 30 कोटी खर्च करण्याचे नियोजन असल्याचे मुख्य अभियंता धुमाळ यांनी सांगितले.
रब्बीत कुकडी डाव्या कालव्याचे एक, तर घोड कालव्यातून दोन आवर्तने
कुकडी डावा कालव्याचे सुरू असलेल्या रब्बी हंगामात एक आवर्तन आणि उन्हाळी एक आवर्तन देण्यात येणार असून, पाणीसाठ्याचा आढावा घेऊन उन्हाळी हंगामाच्या दुसर्या आवर्तनाबाबत बैठक घेण्याचेही ठरले. माणिकडोह धरणातून येडगाव धरणासाठी कुकडी नदीद्वारे, पिंपळगाव जोगे डावा कालवा, डिंभे उजवा कालवा, डिंभे डावा कालवा, घोड शाखा कालवा, मीना शाखा कालवा, मीना पूरक कालवाद्वारे पाणी सोडण्याचे नियोजनही करण्यात आले.
घोड डावा व उजव्या कालव्याची रब्बीची दोन आवर्तने सोडण्याचे निश्चित करण्यात आले. रब्बी हंगामानंतर पाणीसाठा उन्हाळी आवर्तनाबाबत बैठक घेण्यात येईल, असेही सांगण्यात आले. या वेळी पाणी सोडण्याच्या नियोजनाबाबत उपस्थित आमदारांनी विविध सूचना केल्या. बैठकीस कार्यकारी अभियंता प्रशांत कडूस्कर, स्वप्नील काळे, एस. जे. माने, एम. एम. कुलकर्णी आदी उपस्थित होते.