पिंपरी : तरुणाचा खून करून ओढ्यात फेकला मृतदेह

पिंपरी : दारू पिण्याच्या बहाण्याने निर्जनस्थळी नेऊन दोघांनी मिळून एकाचा खून केला. त्यानंतर मृतदेह ओढ्यात फेकून पुरावा नष्ट करण्याचा प्रयत्न केला. ही घटना शनिवारी (दि. 24) चर्‍होली बुद्रुक येथे उघडकीस आली.  गणेश लक्ष्मण गायकवाड (34, रा. हडपसर, पुणे) असे खून झालेल्याचे नाव आहे. याप्रकरणी गणेशचा चुलत भाऊ तुषार गायकवाड (40, रा. धनकवडी, मूळ रा. रिसे, ता. पुरंदर) यांनी दिघी पोलिस ठाण्यात फिर्याद दिली आहे. त्यानुसार, मोहम्मद जहीर सुनशरीफ शेख उर्फ सलीम (34, रा. लोहगाव, पुणे), गिरीश गायकवाड (44, रा. लोहगाव) यांना पोलिसांनी अटक केली आहे.

गणेश गायकवाड यांना आरोपी मोहम्मद आणि त्याच्या सोबत असलेला गिरीश यांनी दारू पिण्याच्या बहाण्याने चर्‍होली बुद्रुक येथे नेले. तेथे गणेश यांच्या डोक्यात मारून गंभीर जखमी केले. दरम्यान, गणेश यांचा मृत्यू  झाल्यानंतर आरोपींनी पुरावा नष्ट करण्यासाठी त्यांचा मृतदेह गुलमोहर सोसायटीच्या समोरील ओढ्यात फेकला. तब्बल दोन आठवडे मृतदेह पाण्यात होता. शनिवारी हा प्रकार उघडकीस आला.