इंदापूर: तालुक्यातील खोरोची येथील उत्तम जालिंदर जाधव यांच्यावर गुरुवारी दुपारच्या सुमारास धारदार शस्त्राने वार करण्यात आले होते. यामध्ये उत्तम जाधव हे गंभीर जखमी झाले होते. त्यांच्यावर खासगी रुग्णालयात उपचार सुरू होते. मात्र उपचारा दरम्यान उत्तम जाधव यांचा मृत्यू झाल्याची माहिती सहाय्यक पोलीस निरीक्षक शंकर राऊत यांनी दिली आहे.
जाधव हे इंदापूर तालुक्यातील खोरोची गावचे रहिवासी असून इंदापूर तालुक्यातील निमसाखर परिसरात त्यांच्यावर हा हल्ला झाला होता. याप्रकरणी इंदापूर पोलिसात आठ आरोपी विरोधात गुन्हा दाखल करण्यात आला असून इंदापूर पोलिसांनी एका आरोपीला ताब्यात घेतले आहे.तर उर्वरित सात आरोपींचा शोध इंदापूर पोलीस आणि पुणे ग्रामीण पोलिसांच्या स्थानिक गुन्हे शाखेकडून सुरू आहे.
या प्रकरणात आणखीही आरोपींचा समावेश असण्याची शक्यता पोलिसांकडून वर्तविण्यात आली आहे. हा हल्ला नेमका कोणत्या कारणातून झाला याचे कारण अद्याप समोर आलेले नाही. दरम्यान या हल्ल्यामुळे पुन्हा एकदा निरा खोऱ्यामध्ये गुन्हेगारीने डोके वर काढल्याची चर्चा सुरू झाली आहे.