पुणे: डोंबिवलीतील शास्त्रीनगर रुग्णालयातील डॉक्टर आणि कर्मचाऱ्यांवरील हल्ल्याच्या निषेधार्थ आयएमए व इतर वैद्यकीय संघटनांनी २० जुलै रोजी पुकारलेला 'कामबंद' निर्णय मुंबई उच्च न्यायालयाच्या आवाहनानंतर तात्पुरता स्थगित करण्यात आला आहे.
न्यायालयाने या प्रकरणाची स्वतःहून दखल घेत आरोपीचा जामीन स्थगित केला आणि १९ जुलैपर्यंत आत्मसमर्पण करण्याचे आदेश दिले आहेत. न्यायालयाच्या या सकारात्मक भूमिकेचा आदर करत आणि रुग्णांचे हित लक्षात घेऊन डॉक्टरांनी आंदोलन मागे घेतले आहे.
मात्र, 'महाराष्ट्र आरोग्य सेवा संरक्षण कायदा २०१०' अधिक सशक्त आणि अजामीनपात्र करण्याची मागणी कायम असल्याचे आयएमएने स्पष्ट केले आहे. जर सरकारने याबाबत अध्यादेश काढून मागण्या मान्य न केल्यास, ९ ऑगस्ट पासून राज्यभर बेमुदत आंदोलन छेडण्याचा इशारा संघटनेच्या वतीने डॉ. संतोष कुलकर्णी, डॉ. विक्रांत देसाई आणि डॉ. अमोल गित्ते यांनी दिला आहे. या आंदोलनामुळे उद्भवणाऱ्या परिस्थितीची सर्वस्वी जबाबदारी सरकारची असेल, असेही यावेळी डॉ कुलकर्णी यांनी यावेळी सांगितले.