जुन्नर: छत्रपती श्री शिवाजी महाराज यांचे जन्मस्थळ किल्ले शिवनेरी येथे हजारो शिवभक्त तसेंच पर्यटक भेट देत असतात. आज रविवार सुटीचा दिवस असल्याने अनेक शिवभक्त तसेच पर्यटक शिवजन्मस्थळाचे दर्शन घेण्यासाठी गडावर उपस्थित होते.
अशातच शिवनेरी किल्ल्यावर पर्यटकांवर मधमाशांच्या हल्ला झाल्याची माहिती समोर आली आहे. या हल्ल्यात 30 ते 40 जण जखमी झाल्याची माहिती आहे. त्यांच्यावर ग्रामीण रुग्णालय जुन्नर येथे प्राथमिक उपचार करण्यात आले.
त्यामुळे शिवनेरी किल्ल्यावर दुर्गप्रेमींची धावपळ पहायला मिळत आहे. ही घटना सकाळी सव्वा नऊ च्या दरम्यान घडली असल्याचे सांगितले जात आहे. यावेळी गडावर उपस्थित असलेले खासदार निलेश लंके यांनी ही मदतकार्यास सहभाग घेतला.
शिवाई देवी मंदिर व शिवजन्मस्थळाचे जवळ ही घटना घडल्याने सर्व शिवभक्त व पर्यटकांना रेसक्यू टीम व वनविभागाच्या वतीने सुखरूप गडावरून खाली उतरवण्यात आले. आरोग्य विभागाच्या सहा ते सात ॲम्बुलन्स शिवनेरी किल्ल्याच्या पायथ्याशी दाखल झाल्या आहेत. तर काही विद्यार्थी गडावर अडकल्याची भीती व्यक्त केली जात आहे. वनविभागाचे आगी मोहोळ शांत करण्याचे शर्तीचे प्रयत्न सुरू आहेत.
ऐन उन्हाळ्यात अशा घटना वारंवार घडत असून १९ फेब्रुवारी रोजी शिवजयंती उत्सवादरम्यान मराठा सेवा संघाच्या वतीने आयोजित अभिवादन सभा संपल्यानंतर मुख्यमंत्री देवेंद्र फडणवीस तसेच उपमुख्यमंत्री अजित पवार व एकनाथ शिंदे यांच्या हेलिकॉप्टरने प्रस्थान केल्यानंतर थोड्याच वेळाने आग्या मोहोळाच्या मधमाशा चावल्याने अनेक शिवभक्त जखमी झाले होते.