Pune News: हिरव्या, टपोर्या दाण्यांच्या मटारचा हंगाम सुरू झाला असून हिमाचल प्रदेश येथून मटार बाजारात दाखल होऊ लागला आहे. रविवारी मार्केट यार्डातील तरकारी विभागात एक टेम्पो मटार दाखल झाला. आवकच्या तुलनेत मागणी जास्त असल्याने घाऊक बाजारात दहा किलोला 1400 ते 1500 रुपये दर मिळाला. किरकोळ बाजारात 250 ते 300 रुपये किलो दराने विक्री सुरू आहे.
कृषी उत्पन्न बाजार समितीच्या गुलटेकडी मार्केट यार्डात मागील आठवड्यात दसर्यामुळे आवक कमी झाली होती. या आठवड्यात मात्र, आवक वाढली आहे. बाजारात दाखल झालेल्या मालाला चांगला उठावही राहिला. (Latest Market Update)
आवकच्या तुलनेत मागणी जास्त असल्यामुळे बटाटा, गवार, हिरवी मिरची, सिमला मिरची, बीट आणि घेवड्याच्या भावात 10 ते 20 टक्क्यांनी वाढ झाली आहे. तर मागणी आणि पुरवठा यातील समतोलामुळे उर्वरित फळभाज्यांचे भाव स्थिर आहेत. तरकारी बाजारात राज्यासह परराज्यांतून मिळून रविवारी (दि. 20) सुमारे 90 ट्रक शेतीमालाची आवक झाली.
परराज्यांतून झालेल्या आवकमध्ये कर्नाटक आणि गुजरात येथून हिरवी मिरची 7 ते 8 टेम्पो, कर्नाटक आणि गुजरात येथून कोबी 3 ते 4 टेम्पो, कर्नाटक येथून पावटा 2 टेम्पो, आंध्रप्रदेश, तमिळनाडू येथून शेवगा 3 ते 4 टेम्पो, इंदौर येथून 5 ते 6 टेम्पो गाजर, कर्नाटक आणि गुजरात येथून घेवडा 3 ते 4 टेम्पो, गुजरात येथून 3 टेम्पो भुईमूग शेंग, हिमाचल प्रदेश येथून 1 टेम्पो मटार, मध्य प्रदेश येथून लसूण सुमारे 7 ते 8 टेम्पो इतकी आवक झाली होती.
स्थानिक भागातून झालेल्या आवकमध्ये सातारी आले सुमारे 400 ते 500 गोणी, भेंडी 5 ते 6 टेम्पो, गवार 5 ते 6 टेम्पो, टोमॅटो सहा ते साडेसहा हजार पेटी, हिरवी मिरची 2 ते 3 टेम्पो, काकडी 7 ते 8 टेम्पो, फ्लॉवर 7 ते 8 टेम्पो, कोबी 4 ते 5 टेम्पो, सिमला मिरची 7 ते 8 टेम्पो, भुईमूग शेंग 40 ते 50 गोणी, मटार पुरंदर, पारनेर, वाई आणि सातारा परिसरातून 40 ते 50 गोणी, तांबडा भोपळा 8 ते 10 टेम्पो, कांदा सुमारे 70 ते 80 ट्रक, इंदौर, आग्रा, स्थानिक भागातून बटाटा 35 ते 40 टेम्पो आवक झाली.
कोथिंबिर, मेथी, पालक, पुदीना अंबाडी महागली
तरकारी विभागात कोथिंबिरीची आवक घटली आहे. त्या तुलनेत मागणी जास्त आहे. परिणामी, कोथिंबिरीच्या भावात घाऊक बाजारात जुडीमागे पाच रुपयांनी वाढ झाली आहे. घाऊक बाजारात दर्जानुसार 10 ते 20 रुपये जुडी भावाने कोथिंबिरीची विक्री होत आहे. तर आवक स्थिर असून, मागणी वाढल्यामुळे मेथीच्या भावात जुडीमागे पाच रुपयांनी वाढ झाली आहे. मेथीला घाऊक बाजारात जुडीस 15 ते 25 रुपये भाव मिळत आहे.
याबरोबरच पालक तीन रुपये, पुदीना 2 रुपये आणि अंबाडी 1 रुपयांनी महागली आहे. तर आवकच्या तुलनेत मागणी कमी असल्यामुळे घाऊक बाजारात शेपू आणि कांदापातच्या भावात जुडीमागे प्रत्येकी तीन रुपये, चुका दोन रुपये आणि चवळईच्या भावात एक रुपयांनी घट झाली आहे.
मागणी आणि पुरवठा यातील समतोलामुळे उर्वरित पालेभाज्यांचे भाव गेल्या आठवड्याच्या तुलनेत स्थिर असल्याचे व्यापार्यानी सांगितले. येथील बाजारात रविवारी (दि. 20) कोथिंबिरीची सुमारे 80 हजार जुडी आवक झालीर, जी गेल्या आठवड्यात सव्वा लाख जुडी होती. तर मेथीची आवक स्थिर आहे. 50 हजार जुडी आवक नोंदविण्यात आली.