पुणे: येरवडा कारागृहात न्यायालयीन कोठडीत असलेल्या गजा मारणेला सांगली कारागृहात हलवताना पोलिस व्हॅनचा पाठलाग करणार्या मारणेच्या साथीदारांच्या चार महागड्या गाड्या पोलिसांनी जप्त केल्या आहेत. उर्वरित आरोपींच्या वाहनांचा शोध सुरू आहे.
गजा मारणेच्या सातार्याजवळील ढाब्यावरील मटण पार्टी प्रकरणात त्याचा सांगलीतील साथीदार पांडुरंग ऊर्फ पांड्या मोहिते याच्यासह तिघांविरुद्ध गुन्हा दाखल करण्यात आला आहे. गुन्हे शाखेने मोहितेला नुकतीच सांगलीतून अटक केली आहे. याप्रकरणी पोलिस आयुक्त अमितेश कुमार यांनी एका सहायक पोलिस निरीक्षकासह चार पोलिस कर्मचार्यांचे निलंबन केले आहे.(Latest Pune News)
कोथरूडमधील सिटी प्राईडसमोर एका सॉफ्टवेअर इंजिनिअरला भर रस्त्यात मारहाण केल्याप्रकरणी पोलिसांनी मारणेसह सहा जणांवर महाराष्ट्र संघटित गुन्हेगारी नियंत्रण कायद्यान्वये (मकोका) कारवाई केली आहे. या प्रकरणात याआधी मारणेच्या दोन महागड्या गाड्यांसह एकूण चार गाड्या जप्त करण्यात आल्या होत्या.
येरवडा कारागृहातून मारणेला सांगली कारागृहात हलवताना पोलिस व्हॅन सातार्याजवळ एका ढाब्यावर थांबली होती. मारणेचे साथीदार गाड्यांमधून पोलिस व्हॅनच्या मागे होते. ढाब्यावर व्हॅन थांबल्यावर मारणेच्या साथीदारांनी त्याला व्हॅनमध्ये नेऊन बिर्याणी खाऊ घातली.
मारणेसोबत बंदोबस्तासाठी असलेले सहायक निरीक्षक आणि चार पोलिस कर्मचार्यांनीही ढाब्यावर जेवण केले. याची माहिती मिळताच पोलिस आयुक्त अमितेश कुमार यांनी त्या चार पोलिसांना निलंबित केले.
पोलिस व्हॅनचा मारणेच्या साथीदारांनी गाड्यांमधून पाठलाग केला होता. सीसीटीव्ही फुटेजमध्ये सहा ते सात गाड्या दिसून आल्या आहेत. या प्रकरणात चार गाड्या जप्त करण्यात आल्या असून, उर्वरित गाड्या चालवणार्यांचा शोध घेतला जात आहे, अशी माहिती गुन्हे शाखेचे सहायक पोलिस आयुक्त गणेश इंगळे यांनी दिली.