पिंपरी : रावेत परिसरात सापळा रचून अंमली पदार्थ विरोधी पथकाने चार किलो गांजा जप्त केला. मंगळवारी (दि. 13) दुपारी रमाबाईनगर, शिंदेवस्ती येथे ही कारवाई करण्यात आली. मोहम्मद राजू नसरुद्दीन अली (27, रा. शिंदेवस्ती, रावेत) असे अटक केलेल्या आरोपीचे नाव आहे. त्यांच्यासह ओटास्कीम, निगडी येथे राहणार्या महिलेविरोधात गुन्हा दाखल करण्यात आला आहे.
पोलिसांनी दिलेली माहितीनुसार, आरोपी मोहम्मद हा सोबत गांजा बाळगत असल्याची माहिती पिंपरी- चिंचवड गुन्हे शाखेच्या अंमली पदार्थ विरोधी पथकाला मिळाली. त्यानुसार, त्यांनी मोहम्मद याच्या घरी छापा मारून कारवाई केली. त्या वेळी पोलिसांना एक लाख 950 रुपये किमतीचा चार किलो 38 ग्रॅम वजनाचा गांजा मिळून आला. पोलिस तपासात आरोपी मोहम्मद याने हा गांजा ओटास्किम येथे राहणार्या एका महिलेकडून आणला असल्याचे निष्पन्न झाल्याने महिलेच्या विरोधातदेखील गुन्हा दाखल करण्यात आला आहे.