बारामती; पुढारी वृत्तसेवा: राज्यातील सत्तांतरानंतर बारामती लोकसभा मतदारसंघात एकनाथ शिंदे यांच्या बाळासाहेबांची शिवसेना या पक्षाने विस्तारासाठी पावले टाकण्यास सुरुवात केली आहे. माजी मंत्री विजय शिवतारे यांनी त्यासाठी पुढाकार घेतला असून, शनिवारी (दि. 5) ते बारामती, इंदापूर तालुक्याच्या दौर्यावर येत आहेत. शिवसेनेतील बंडानंतर शिवतारे यांनी एकनाथ शिंदे यांच्या गटासोबत जाणे पसंत केले होते.
बारामती तालुक्यात यापूर्वी त्यांनी मोठा जनसंपर्क ठेवला होता. गत निवडणुकीत राष्ट्रवादीचे नेते अजित पवार यांनी त्यांना आव्हान दिले होते. आता शिवतारे यांनी बारामतीवर लक्ष केंद्रित करण्याचे धोरण हाती घेतले आहे. केंद्रीय अर्थमंत्री निर्मला सीतारामन यांच्या दौर्यानंतर राष्ट्रवादीच्या विरोधकांना येथे बूस्ट मिळाला आहे. तत्पूर्वी, भाजप प्रदेशाध्यक्ष चंद्रशेखर बावनकुळे यांनी बारामतीचा दौरा करीत कार्यकत्र्यांमध्ये जाण आणली होती.
त्यात आता शिवतारे यांच्या दौर्याने अधिक बळ मिळणार आहे. बारामतीत भाजप व बाळासाहेबांची शिवसेना हे दोन्ही पक्ष वाढीसाठी प्रयत्नशील आहेत. आगामी काळात नगरपरिषदेसह जिल्हा परिषद, पंचायत समिती निवडणुका पार पडणार असून, त्यादृष्टीनेही दोन्ही पक्षांकडून हालचाली सुरू झाल्या आहेत. बारामतीत सायंकाळी चार वाजता शिवतारे हे तालुक्यातील कार्यकत्र्यांशी संवाद साधणार आहेत. येथील कृष्णसागर हॉटेल येथे ही बैठक होणार आहे. त्यानंतर ते पत्रकारांशी संवाद साधणार आहेत.