रांजणगाव गणपती; पुढारी वृत्तसेवा : संकष्टी चतुर्थीनिमित्त रविवारी (दि. 12) श्रीक्षेत्र रांजणगावच्या महागणपतीचे दर्शन घेण्यासाठी भाविकांनी मोठ्या प्रमाणावर गर्दी केली. पहाटे 5 वाजता अभिषेक करून मंदिर भाविकांसाठी खुले केले होते. हजारो भाविकांनी महागणपतीचे मनोभावे दर्शन घेतले. संकष्ट चतुर्थीनिमित्त भाविकांसाठी जलद दर्शन व्यवस्था, खिचडी प्रसाद, पिण्याचे पाणी तसेच श्री क्षेत्र रांजणगाव गणपती देवस्थान ट्रस्ट व अष्टविनायक ब्लड बँक यांच्या संयुक्त विद्यमाने रक्तदान शिबिर झाले.
देवस्थान ट्रस्टतर्फे भाविकांना विविध सुविधा देण्यात आल्या. पहाटे अभिषेक, 12 वाजता महापूजा व महानैवेद्य करण्यात आला. प्रगतशील शेतकरी नानासाहेब दिनकरराव पाचुंदकर पाटील यांच्या वतीने गाभार्यात फुलांची आकर्षक सजावटही केली होती. या वेळी देवस्थानचे विश्वस्त मंडळ डॉ. संतोष दुंडे, प्रा. नारायण पाचुंदकर, अॅड. विजयराज दरेकर, व्यवस्थापक बाळासाहेब गोर्हे, हिशेबनीस संतोष रणपिसे, पुजारी प्रसाद कुलकर्णी, मकरंद कुलकर्णी व देवस्थान कर्मचारी आदी मान्यवर उपस्थित होते. रांजणगाव एमआयडीसी पोलिस स्टेशनचे पोलिस निरीक्षक बलवंत मांडगे यांच्या मार्गदर्शनाखाली चोख बंदोबस्त ठेवला होता.