पुणे; पुढारी वृत्तसेवा : शेजारी राहणार्या महिलेने प्रेमाच्या जाळ्यात अडकवून एका तरुण व्यावसायिकाकडून 8 लाख 39 हजाराची खंडणी उकळली. यानंतर पुन्हा दहा लाखांच्या खंडणीची मागणी करण्यात आली. मात्र, सततच्या तगाद्याला कंटाळून तरुणाने भारती विद्यापीठ पोलिस ठाण्यात धाव घेत तक्रार दाखल केली. याप्रकरणी सातारा येथील 37 वर्षीय तरुणाने दिलेल्या फिर्यादीनुसार महिला, तिचा पती आणि दाजी यांच्याविरुद्ध भारती विद्यापीठ पोलिस ठाण्यात खंडणीचा गुन्हा दाखल केला आहे.
दरम्यान संबंधित महिलेनेसुद्धा फिर्यादीवर भारती विद्यापीठ पोलिस ठाण्यात बलात्काराचा गुन्हा दाखल केला आहे. पोलिसांनी दिलेल्या माहितीनुसार फिर्यादी हे मूळचे साताराचे असून इस्टेट एजन्सीचा व्यवसाय करतात. त्यांचे मुंबईला नेहमी येणे-जाणे असते. सोयीसाठी त्यांनी दत्तवाडी येथे सदनिका घेतली आहे. त्यांच्या घरासमोरच आरोपी महिला राहते. ती स्वत:हून ओळख वाढवून चहा आणि नाष्ट्याच्या बहाण्याने फिर्यादीला घरी बोलावून घेत होती. यानंतर जवळीक वाढून त्यांच्यामध्ये शरीरसंबंध निर्माण झाले.
दरम्यान तिने याची छायाचित्रेही फिर्यादीला काढायला लावली. यानंतर ती वारंवार पैशाची मागणी करू लागली. पैसे न दिल्यास घरच्यांना सांगण्याची धमकी दिली जात होती. दरम्यान तिच्या दाजीने प्रकरण मिटवण्याच्या नावाखाली फिर्यादीच्या मोबाईलमधील फोटो स्वत:च्या मोबाईलमध्ये काढून घेतले. त्यानंतर तिचा पती आणि दाजी हेसुध्दा प्रकरण मिटविण्यासाठी पैशाची मागणी करू लागले.
महिलेला वर्षभरात तब्बल 8 लाख 39 हजार रुपये देण्यात आले. त्यानंतरही दहा लाखाच्या खंडणीची मागणी करण्यात आली. या त्रासाला कंटाळून तरुणाने पोलीस ठाण्यात धाव घेतली. याप्रकरणाचा तपास सहायक पोलिस निरीक्षक व्हटकर करत आहेत. तक्रारीमध्ये मानेसोबतच दाजीनेही फोटो नातेवाइकांना पाठविल्याबद्दल आरोपी केले आहे. याप्रकरणाचा तपास पोलिस उपनिरीक्षक भोसले करत आहेत.
हेही वाचा