इंदापूर; पुढारी वृत्तसेवा: आईने मुलाच्या विरोधात इंदापूर पोलिसात तक्रार दिल्याच्या कारणावरून संतापलेल्या मुलाने जन्मदात्या आईला शिविगाळ करत जवळच पडलेला लाकडी ओंडका उचलून आईच्या डोक्यात घालून तिला जखमी केल्याची धक्कादायक घटना इंदापूर तालुक्यातील पळसदेव गावात घडली. याबाबत वैजयंता भिकुदास जाधव (वय 68, रा. पळसदेव, ता. इंदापूर) यांच्या फिर्यादीवरुन दिलीप भिकुदास जाधव (रा. पळसदेव, ता. इंदापूर) याविरूद्ध इंदापूर पोलिसात गुन्हा दाखल करण्यात आला आहे.
याबाबत अधिक माहिती अशी की, सोमवारी (दि. २४) वैजयंता भिकुदास जाधव या घरी होत्या. या दरम्यान मोठा मुलगा दिलीप भानुदास जाधव यांने त्याच्या विरोधात इंदापूर पोलीसांत तक्रार दिल्याच्या कारणावरून शिवीगाळ दमदाटी केली. त्याने जवळ पडलेला लाकडी ओंडका उचलून आई वैजयंता जाधव यांच्या डोक्यात मारून दुखापत केली, आणि त्या चक्कर येऊन खाली जमिनीवर कोसळल्या. त्यानंतर वैजयंता जाधव यांच्यावर खासगी रूग्णालयात प्रथमोपचार करुन पुढील उपचार उपजिल्हा रुग्णालय येथे करण्यात आले आहेत. या गुन्ह्याचा तपास पोलीस हवालदार सुरेंद्र वाघ करीत आहेत.