पुणे: अमली पदार्थ विक्री प्रकरणात गुन्हे शाखेच्या अमली पदार्थविरोधी पथकाने एकाला बेड्या ठोकल्या. कात्रज भागातील मांगडेवाडी परिसरात ही कारवाई करण्यात आली. आरोपीकडून चरस, मोबाईल, रोकड असा एक लाख 69 हजार रुपयांचा मुद्देमाल जप्त करण्यात आला.
शिवलिंग आवटे (वय 39), असे अटक केलेल्याचे नाव आहे. त्याच्याकडून 98 ग्रॅम चरस, दोन मोबाईल संच, रोकड असा मुद्देमाल जप्त केला आहे. आवटे पुणे-सातारा रस्त्यावरील मांगडेवाडीत अमली पदार्थ विक्री करण्याच्या तयारीत असल्याची माहिती अमली पदार्थविरोधी पथकाला मिळाली. त्यानंतर पोलिसांनी सापळा लावून त्याला पकडले.
त्याची झडती घेण्यात आली, तेव्हा त्याच्याकडे चरस सापडले. आवटेने चरस कोठून आणले, तसेच कोणाला विक्री करणार होता, या दृष्टीने तपास करण्यात येत आहे. अतिरिक्त पोलीस आयुक्त शैलेश बलकवडे, उपायुक्त निखिल पिंगळे, सहायक आयुक्त गणेश इंगळे यांच्या मार्गदर्शनाखाली पोलीस निरीक्षक उल्हास कदम, सहायक निरीक्षक अनिकेत पोटे, उपनिरीक्षक दिगंबर कोकाटे, प्रवीण उत्तेकर, संदीप शिर्के, सचिन माळवे, विपुल गायकवाड, संदेश काकडे यांनी ही कारवाई केली.