मंचर: दूध भेसळ प्रकरणात आपल्याला 'आका' किंवा 'मास्टर माइंड' संबोधून गैरसमज निर्माण करणाऱ्यांविरोधात उच्च न्यायालयात १०० कोटी रुपयांचा मानहानीचा दावा दाखल करणार असल्याचे माजी मंत्री दिलीप वळसे पाटील यांनी शनिवारी (दि. २६) सायंकाळी पत्रकार परिषदेत सांगितले. दूध भेसळखोरांना कधीही पाठीशी घातले नाही. दोषींवर कठोर कारवाई झालीच पाहिजे, अशी भूमिकाही त्यांनी स्पष्ट केली.
ज्येष्ठ नेते शरद पवार यांनी मुख्यमंत्र्यांना पत्र पाठवून दूध भेसळ प्रकरणाची सखोल आणि पारदर्शक चौकशी करून दोषींवर कारवाई करण्याची मागणी केली आहे. या भूमिकेचे आपण स्वागत करतो, असे वळसे पाटील म्हणाले. कोणतेही प्रकरण दडपण्याचा प्रश्नच नाही. मात्र, या प्रकरणाशी आपला संबंध जोडून आरोप करणाऱ्यांना न्यायालयीन मार्गाने उत्तर दिले जाईल, असे त्यांनी स्पष्ट केले.
डिंभे-माणिकडोह बोगद्याऐवजी डावा कालवा दुरुस्त केल्यास पाण्याचा प्रश्न सुटू शकतो. या बोगद्याला विरोध दर्शविणारे पत्र १० मार्च २०२१ रोजी तत्कालीन पाटबंधारेमंत्र्यांना दिले होते, असेही त्यांनी सांगितले.
पश्चिम घाट पर्यावरणीय संवेदनशील क्षेत्राच्या अधिसूचनेमुळे आंबेगावातील ५२ आणि जुन्नरमधील ३३ गावांवर परिणाम होण्याची शक्यता आहे. याबाबत केंद्राकडे हरकत नोंदविल्याचे त्यांनी सांगितले. तसेच, प्रकल्पग्रस्तांच्या जमिनींच्या व्यवहारांबाबत तसेच तालुक्यातील सावकारीच्या तक्रारींबाबतही दखल घेतली जाईल, असे वळसे पाटील यांनी नमूद केले.