पुणे; पुढारी वृत्तसेवा : जी 20 परिषदेचे संयोजन भारताकडे येणे आणि त्यातील काही बैठका पुण्यात होणे ही बाब स्वागतार्हच आहे. मात्र, या बैठकीसाठी प्रशासनाने परिषदेचे नियोजन आणि सुशोभीकरण करताना लोकप्रतिनिधींना विश्वासात घेतले नाही. सुशोभीकरणाच्या नावाखाली शहराचे विद्रुपीकरण करण्यात आले, अशी टीका राष्ट्रवादी काँग्रेसच्या राज्यसभा खासदार अॅड. वंदना चव्हाण यांनी केली. राष्ट्रवादी काँग्रेसच्या शहर कार्यालयात सोमवारी आयोजित केलेल्या पत्रकार परिषदेत अॅड. चव्हाण बोलत होत्या. यावेळी शहराध्यक्ष प्रशांत जगताप व प्रवक्ते प्रदीप देशमुख उपस्थित होते.
अॅड. चव्हाण म्हणाल्या, जी 20 परिषदेत संबंधित देशांच्याच प्रतिनिधींनाच सहभागी होता येते. त्यासाठी विविध नियम असले, तरी शहरातील सर्व आमदार, खासदारांना किमान उद्घाटन सत्राला आमंत्रित करणे गरजेचे होते. बैठकीसाठी शहराचे सुशोभीकरण करण्यापूर्वी शहरातील सर्व आमदार, खासदार, मोठे कलाकार, मान्यवरांशी सल्लामसलत करायला हवी होती. मात्र, तसे केले गेले नाही. सध्या अस्वच्छ परिसराभोवती पडदे लावून लपवाछपवी सुरू आहे,असेही अॅड. चव्हाण म्हणाल्या.
गेल्या पाच वर्षांत शहरातील सत्ताधारी भाजपने पायाभूत सुविधांच्या विकासाकडे दुर्लक्ष केले. त्यामुळे या बैठकीसाठी शहराचे सुशोभीकरण करताना पुणे महापालिकेची दमछाक होत आहे. शहरातील रस्ते, पदपथ, उड्डाणपूल यांची घाईगडबडीमध्ये रंगरंगोटी करण्यात आली. कित्येक ठिकाणचा राडारोडा पहिल्यांदाच उचलला गेला. निकृष्ट दर्जाच्या सुशोभीकरणाची मंगळवारपासून पोलखोल करणार असल्याचे यावेळी जगताप यांनी सांगितले.
फ्लेक्सला राष्ट्रवादीचा विरोधच
पुणे प्लॅटफॉर्म फॉर कोलॅबरेटिव्ह रिस्पॉन्सने (पीपीसीआर) सुरू केलेल्या नो फ्लेक्स मोहिमेला आमचा पाठिंबा आहे. अनधिकृत फ्लेक्सला राष्ट्रवादी काँग्रेसने कायमच विरोध केला आहे. मात्र, एका विशिष्ट पक्षाचे फ्लेक्स शहरभर दिसून येतात. ते पाहून आमचेही कार्यकर्ते फ्लेक्स लावतात. पालिकेने निःपक्षपाती कारवाई करावी, असेही अॅड. चव्हाण यांनी