खडकवासला : पुढारी वृत्तसेवा : पुणे-पानशेत रस्त्यावरील सोनापूर येथील पूल व रस्ता खचल्याने वाहतुकीस पुन्हा धोका निर्माण झाला आहे, त्यामुळे सार्वजनिक बांधकाम विभागाने या ठिकाणी वाहतूक एकेरी सुरू केली आहे. पर्यटकांसह नागरिकांना येथून प्रवास करताना कसरत करावी लागत आहे. खडकवासला धरणाच्या पाणलोट क्षेत्रालगत असलेला हा रस्ता निम्म्याहून अधिक खचल्याने अपघाताची शक्यता नाकारता येत नाही. या पुलासाठी शासनाने पाच कोटी रुपयांच्या निधी मंजूर केला आहे.
मात्र, निविदा प्रक्रियेच्या लालफितीमुळे अद्यापही हे काम सुरू झाले नाही. दुसरीकडे खचत चाललेल्या रस्त्यामुळे नागरिकांना जीव मुठीत धरून ये-जा करावी लागत आहे. गेल्या आठवड्यात लागोपाठ दोन दिवस जोरदार अवकाळी पाऊस पडल्याने धरणाशेजारील पूल व रस्त्याचा मोठा भाग खचला. एका बाजूला डोंगर व दुसर्या बाजूला खोल धरणक्षेत्र आहे. त्यामुळे येथून ये-जा करण्यासाठी पर्यायी जागा नाही. समोरासमोरुन वाहनांना ये-जा करता येत नाही, त्यामुळे बांधकाम विभागाने खबरदारीसाठी खचलेल्या रस्त्यावरील वाहतूक बंद करून मध्यभागी बाबूंचे दुभाजक उभे केले असून, सावधानतेचा इशारा देणारे फलक लावले आहेत.
गेल्या अनेक वर्षांपासून पूल व दोन्ही बाजूंचा रस्ता खचत आहे. त्यामुळे कायमस्वरूपी उपाययोजना करून पूल उभारण्यासाठी पाच कोटी रुपयांचा निधी मंजूर झाला आहे. पावसाळ्यापूर्वी रस्ता तयार होण्यासाठी पाठपुरावा सुरू आहे.
– भीमराव तापकीर, आमदारपुलाच्या कामासाठी निविदा प्रक्रिया अंतिम टप्प्यात आहे. मंजुरीनंतर तातडीने काम सुरू केले जाणार आहे, सध्या खबरदारीसाठी उपाययोजना केल्या आहेत.
– एस. टी. लकडे, शाखा अभियंता, सार्वजनिक बांधकाम विभाग