येत्या २ ते ३ दिवसांत राज्यातून मान्सून माघारीला सुरुवात

पुढारी ऑनलाईन डेस्क : येत्या २ ते ३ दिवसांत महाराष्ट्राच्या (Maharashtra Weather Forecast) काही भागातून मान्सून (Southwest Monsoon) माघारीला सुरुवात होण्याची शक्यता आहे. दरम्यान, महाराष्ट्रात पुढील ४, ५ दिवसांत विजांचा कडकडाट, मेघगर्जनेसह हलका ते मध्यम पाऊस आणि सोसाट्याच्या वाऱ्याची काही ठिकाणी शक्यता आहे, अशी माहिती भारतीय हवामानशास्त्र विभागाच्या पुणे केंद्राचे प्रमुख डॉ. कृष्णानंद होसाळीकर यांनी बुधवारी दिली. पुण्यासह दक्षिण कोकणातील काही भागांत ढगाळ हवामान असल्याने पावसाची शक्यता आहे.

नैऋत्य मान्सून पश्चिम उत्तर प्रदेशच्या उर्वरित भागातून, मध्य प्रदेशातील आणखी काही भाग, पूर्व राजस्थानचा उर्वरित भाग, गुजरातमधील आणखी काही भाग आणि महाराष्ट्राच्या काही भागांतून पुढील २ ते ३ दिवसांत माघारी फिरण्यास अनुकूल परिस्थिती असल्याचे हवामान विभागाने म्हटले आहे.

आग्नेय बांगलादेश आणि शेजारच्या परिसरात 'सायक्लॉनिक सर्क्युलेशन' घोंघावत आहे. त्याच्या प्रभावाखाली ४ ऑक्टोबरच्या दरम्यान उत्तर बंगालच्या उपसागरात आणि आजूबाजूच्या परिसरात कमी दाबाचे क्षेत्र तयार होण्याची शक्यता आहे.

आज मान्सून संपूर्ण जम्मू आणि काश्मीर, लडाख, मुझफ्फराबाद, हिमाचल प्रदेश, उत्तराखंड, पंजाब आणि हरियाणा- चंदीगड दिल्ली तसेच पश्चिम राजस्थानचा उर्वरित भाग, पश्चिम उत्तर प्रदेश, पश्चिम मध्य प्रदेश आणि पूर्व राजस्थानच्या काही भागातून माघारी परतला आहे.