सुषमा नेहरकर-शिंदे :
पुणे : महाराष्ट्र औद्योगिक विकास महामंडळाच्या चाकण टप्पा क्रमांक पाचसाठी खेड तालुक्यातील सहा गावांतील 693.94 हेक्टर क्षेत्र संपादित करण्यात येणार असून, आतापर्यंत तब्बल पन्नास टक्क्यांपेक्षा अधिक 398.86 हेक्टर क्षेत्र एमआयडीसीच्या ताब्यात आले आहे. अद्यापही 295 हेक्टर क्षेत्र ताब्यात आले नसून, शेतकर्यांची संमती घेणे कठीण झाले आहे. यामुळे आता शिल्लक क्षेत्र सक्तीने संपादित करण्यात येणार आहे. यासाठीचा प्रस्ताव खेड प्रांताधिकार्यांनी राज्य शासनाला पाठवला आहे.
पुणे जिल्ह्यातील चाकण, रांजणगाव, तळेगाव या औद्योगिक क्षेत्रात जमीन मिळावी, यासाठी देशात आणि परदेशातील उद्योजकांची सर्वाधिक मागणी आहे, त्यातही चाकण औद्योगिक क्षेत्राला उद्योजकांची सर्वाधिक पसंती असते. यामुळेच चाकण औद्योगिक क्षेत्रात एक नाही, दोन नाही तब्बल पाच टप्प्यांत भूसंपादन करण्यात आले आहे.
महाराष्ट्र औद्योगिक विकास महामंडळ चाकण टप्पा क्रमांक पाचसाठी खेड तालुक्यातील आंबेठाण, रोहकल, गोनवडी, बिरदवडी, चाकण आणि वाकी खुर्द या सहा गावातील 693.94 हेक्टर क्षेत्र संपादित करण्यात येणार आहे. शेतकर्यांच्या संमतीने आतापर्यंत 296.66 हेक्टर संपादित करण्यात आले आहे. परंतु, आता शिल्लक क्षेत्रासाठी सक्तीने संपादित करण्यात येणार आहे. याचा शेतकर्यांना कोट्यवधी रुपयांचा फटका बसणार आहे. जिल्हाधिकार्यांच्या अधिकारातील 25 टक्के अनुदानासाठीदेखील मुकावे लागणार असल्याचे स्पष्ट झाले आहे.
चाकण टप्पा पाचसाठी प्रस्तावित व आतापर्यंत संपादित झालेले क्षेत्र व सक्तीने संपादित होणारे क्षेत्र (हेक्टरमध्ये)
गाव प्रस्तावित क्षेत्र संपादित क्षेत्र सक्तीने संपादित
आंबेठाण 249.89 120.51 69.8
रोहकल 178.68 86.24 58.5
गोनवडी 91.12 71.30 11.1
बिरदवडी 28.17 14.53 13.6
चाकण 88.73 4.06 84.7
वाकी खुर्द 57.35 0 57.35
एकूण 693.94 296.66 295.1
चाकण टप्पा पाचसाठी गेल्या अनेक वर्षांपासून भूसंपादन प्रक्रिया सुरू आहे. यासाठी शेतकर्यांच्या वारंवार बैठका घेऊन त्यांना कसा फायदा होईल, याची माहिती देण्यात आली. यामुळेच आता पन्नास टक्क्यांपेक्षा अधिक भूसंपादन झाले; परंतु आता सक्तीने भूसंपादनाशिवाय पर्याय नाही. यामुळेच चाकण टप्पा पाचसाठी सक्तीने भूसंपादन करण्यास परवानगी मिळावी, यासाठी राज्य शासनाला प्रस्ताव पाठविला आहे.
– विक्रांत चव्हाण, खेड, प्रांताधिकारी