पुणे; पुढारी वृत्तसेवा : उच्च शिक्षण संचालनालयाचे संचालक डॉ. शैलेंद्र देवळाणकर यांनी 2023-24 या शैक्षणिक वर्षाच्या प्रवेशासाठी उच्च शिक्षण विभागाच्या अखत्यारित असलेल्या आठ अभ्यासक्रमांच्या प्रवेशासाठी आवश्यक सीईटीचा अभ्यासक्रम जाहीर केला आहे. त्यानुसार विधीसाठी 150, बीएड-एमएड आणि बीपीएड-एमपीएडसाठी 100 गुणांची परीक्षा होणार असल्याचे स्पष्ट झाले आहे.
उच्च व तंत्रशिक्षण विभागाच्या विविध व्यावसायिक अभ्यासक्रमांसाठी दरवर्षी सीईटी परीक्षा घेण्यात येते. तंत्रशिक्षण विभागाच्या अखत्यारित असलेल्या सीईटी परीक्षांचा अभ्यासक्रम आणि गुणांचे निकष नुकतेच राज्य सामाईक प्रवेश परीक्षा कक्ष अर्थात सीईटी सेलमार्फत जाहीर करण्यात आले होते. त्यामुळे उच्च शिक्षण विभागाच्या सीईटींचा अभ्यासक्रम कधी जाहीर होणार याकडे विद्यार्थ्यांचे लक्ष लागले होते. उच्च शिक्षण विभागाने 8 अभ्यासक्रमांच्या प्रवेशासाठी गुण आणि निकष जाहीर केल्यामुळे विद्यार्थ्यांना सीईटी परीक्षांच्या तयारीसाठी दिशा मिळणार आहे.
उच्च शिक्षण विभागाने जाहीर केलेल्या निकषांनुसार, विधी तीन आणि पाच वर्षे अभ्यासक्रमांची सीईटी परीक्षा 150 गुणांची होणार आहे. त्यासाठी विषय सारखे असले तरी गुणांचे 'वेटेज' मात्र वेगवेगळे देण्यात आले आहे. बीपीएड आणि एमपीएडसाठी लेखी 50 गुणांची आणि शारीरिक चाचणी 50 अशा 100 गुणांची परीक्षा होणार आहे. बीए-बीएड, बीएस्सी-बीएड, बीएडसाठी 100 गुणांची परीक्षा होणार आहे.
बीएड इंग्लिश लँग्वेज कंटेट टेस्ट अर्थात ईएलसीटी ही परीक्षा 50 गुणांची होणार आहे. तर एमएड तसेच बीएड-एमएड एकात्मिक अभ्यासक्रमासाठी 100 गुणांची सीईटी होणार आहे. संबंधित अभ्यासक्रमांची परीक्षा ऑनलाइन स्वरूपात राहणार आहे. परीक्षेत निगेटिव्ह गुण पध्दत राहणार नाही. तसेच साधारणपणे एका प्रश्नासाठी एक गुण अशा पध्दतीचे प्रश्नांचे स्वरूप राहील, असे डॉ. देवळाणकर यांनी स्पष्ट केले आहे.