पुणे: महापालिकेच्या आरोग्य विभागातील एका महिला अधिकार्याचा पाठलाग तसेच अवमानास्पद टिप्पणी करून मानसिक त्रास दिल्याचा प्रकार उघडकीस आला आहे. याप्रकरणी भारतीय जनता पक्षाच्या कामगार आघाडीचा पदाधिकारी ओंकार कदम याच्यासह सहा जणांविरुद्ध शिवाजीनगर पोलिस ठाण्यात गुन्हा दाखल आहे.
याबाबत महिला अधिकार्याने शिवाजीनगर पोलिस ठाण्यात फिर्याद दिली आहे. त्यांनी दिलेल्या फिर्यादीनुसार ओंकार कदम, अक्षय कांबळे यांच्यासह सहा जणांविरुद्ध गुन्हा दाखल केला आहे. (Latest Pune News)
कदम आणि साथीदारांनी कोणतेही शासकीय काम नसताना आरोग्य विभागाच्या कार्यालयात प्रवेश केला. फिर्यादींचा वारंवार पाठलाग करून, कार्यालयीन सहकारी उपस्थित असताना त्यांनी अवमानास्पद टिप्पणी केली. वाईट-वाईट शब्द उचारले. कदम आणि सहकार्यांनी पाठलाग केला. कदम आणि साथीदारांच्या कृत्यामुळे फिर्यादींना मानसिक त्रास झाला तसेच कार्यालयात जाण्यास भीती वाटत आहे, असे महिला अधिकार्याने दिलेल्या फिर्यादीत म्हटले आहे.
दरम्यान, या घटनेची गंभीर दखल घेऊन महापालिका आयुक्त नवलकिशोर राम यांनी ओंकार कदम आणि साथीदारांना महापालिका भवन आणि महापालिकेशी संबंधित सर्व मिळकतींमध्ये प्रवेश करण्यास बंदी घातली आहे. त्यांनी े प्रवेश करण्याचा प्रयत्न केल्यास पोलिस कारवाई करण्याचा इशारा आयुक्तांनी दिला.