इंदापूर : इंदापूरमध्ये गणेश विसर्जनाला गेलेला युवक नदीमध्ये बुडाला आहे. इंदापूर तालुक्यातील श्री क्षेत्र निरा नरसिंहपुर गावी नीरा नदीमध्ये गणेश विसर्जनासाठी मंगळवारी (दि.17) गेलेला. अनिकेत विनायक कुलकर्णी (वय १६, रा. हांडुग्री, ता. परांडा, जि. धाराशिव) असे या युवकाचे नाव आहे.
अनिकेत हा मागील नऊ वर्षापासुन लक्ष्मी नृसिंह वेदपाठशाळेत शिकत होता. दुपारी तीन वाजता निरा नरसिंहपुर येथील नीरा नदीच्या लक्ष्मी घाटावर तो गणेश विसर्जनासाठी गेला होता. त्याचवेळी ही घटना घडली. तीन वाजल्यापासून त्याचा शोध घेतला जात आहे. लक्ष्मी नृसिंह मंदिरालगत नदीत ही घटना घडल्याने गावकऱ्यांसह बघ्यांनी मोठी गर्दी केली आहे. प्रशासनाकडून त्याचा शोध सुरू आहे. घटनास्थळी गावकरी आणि पोलीस प्रशासन, महसूल प्रशासन दाखल असून होडीच्या मदतीने बेपत्ता अनिकेत याचा शोध घेतला जात आहे.