Pune Politics: ज्येष्ठ नेते शरद पवार यांचा 85 वा वाढदिवस दिल्ली येथे 12 डिसेंबरला साजरा करण्यात आला. वाढदिवसानिमित्त त्यांना अजित पवार, सुनेत्रा पवार, पार्थ व जय पवार, रोहित पवार हे भेटण्यासाठी व शुभेच्छा देण्यासाठी गेले होते. त्यात काही राजकीय कारण असेल, असे मला वाटत नाही. तसेच, दोन्ही राष्ट्रवादी काँग्रेस एकत्रित यावेत, अशी कार्यकर्त्यांची इच्छा आहे. मलाही तसेच वाटतेय, असे वक्तव्य राष्ट्रवादी काँग्रेस शरदचंद्र पवार गटाचे आमदार रोहित पवार यांच्या आई सुनंदा पवार यांनी केले.
भीमथडी जत्रा या कार्यक्रमाची माहिती देण्यासाठी त्या कृषी महाविद्यालयात शुक्रवारी (दि.13) सकाळी आल्या होत्या. त्यानंतर माध्यमांशी बोलताना त्यांनी हे वक्तव्य केले.
विखुरलेले राहण्यापेक्षा एकमुठीने पक्ष राहिला, तर महाराष्ट्रात त्याची ताकद चांगली राहील. त्यामुळे शरद पवार, अजित पवार यांच्यासमोर त्यांनी व्यक्त केलेल्या भावनांबद्दल मी कार्यकर्त्यांचा आदर करते.
माझा राजकारणाशी तसा काहीही संबंध नाही. सामाजिक क्षेत्रात मी गेली 35 वर्षे काम करते. प्रचार सोडला, तर मी राजकारणात सक्रिय नसते किंवा राजकीय व्यासपीठावर मी कधी जात नाही. त्यामुळे त्या दोघांनी काय निर्णय घ्यायचा, हे त्यांनी ठरवावे.
सर्वजण चाणक्य म्हणतात आणि त्यांनी राजकारणात 60 वर्षे काढलेली आहेत, अशा ज्येष्ठ नेते शरद पवार यांच्या पत्नीलाही त्यांच्या मनातील गूढ कळत नाही. मग आम्हाला काय कळणार? त्यामुळे दोन्ही पक्ष एकत्र येण्याबद्दलचा निर्णय ते दोघेच घेतील, असेही त्यांनी स्पष्ट केले.