शिवनगर(पुणे) : कुणाच्या ध्यानीमनी नसताना पुणे जिल्ह्यातील बारामती तालुक्यातील सोमेश्वर सहकारी साखर कारखान्याने सन 2022-23 मधील गाळप हंगामात तुटून आलेल्या उसाला प्रतिटन तब्बल 3 हजार 350 रुपये ऊसदर जाहीर करीत राज्यातील ऊसदराची कोंडी फोडल्याने आता शेजारील माळेगाव सहकारी साखर कारखान्याच्या ऊसदराकडे ऊस उत्पादकांचे लक्ष लागून राहिले आहे. यामध्ये मसोमेश्वरफपेक्षा अधिकचा ऊसदर मिळणार का? याबाबत ऊस उत्पादक शेतकर्यांमध्ये कमालीची उत्सुकता असल्याचे दिसते.
उपमुख्यमंत्री अजित पवार यांनी केंद्रीय गृहमंत्री अमित शहा यांच्या उपस्थितीत पुणे येथील कार्यक्रमांमध्ये बारामती तालुक्यातील एक सहकारी साखर कारखाना मागील गाळप हंगामात गाळप झालेल्या उसाला प्रतिटन 3 हजार 350 रुपये ऊसदर देऊ शकेल, असे सुतोवाच केले होते. त्याच आधारावर सोमेश्वर साखर सहकारी साखर कारखान्याच्या संचालक मंडळाने तातडीने बैठक घेत उसाला तब्बल प्रतिटन 3 हजार 350 रुपये ऊसदर जाहीर केला. आता सोमेश्वर सहकारी साखर कारखान्याने जाहीर केलेला ऊसदर पाहता माळेगाव सहकारी साखर कारखान्याच्या ऊस उत्पादक सभासदांमध्ये ऊसदराबद्दल उत्सुकता निर्माण झाली आहे.
माळेगाव साखर कारखान्याने मागील गाळप हंगामात तुटून आलेल्या उसाच्या 'एफआरपी'पोटी 2 हजार 851 दिले आहेत, तर कांडे बिलापोटी प्रतिटन 100 रुपये दिले आहेत, असे एकूण आजपर्यंत ऊस उत्पादक शेतकरी सभासदांना प्रतिटन 2 हजार 951 रुपये मिळाले आहेत. उपमुख्यमंत्री अजित पवार यांच्या अधिपत्याखालील या दोन्ही सहकारी साखर कारखान्यांमध्ये मागील काही गाळप हंगामांचा विचार करता सातत्याने ऊसदराबाबत चुरस असल्याचे दिसते.
गाळप हंगाम सन 2018-19 मध्ये चंद्रराव तावरे व रंजन तावरे यांच्या विचारांचे संचालक मंडळ असताना ऊस उत्पादक शेतकर्यांना उच्चांकी असा 3 हजार 400 रुपये प्रतिटन ऊसदर दिला होता. आता माळेगाव साखर कारखान्याच्या इतिहासातील या उच्चांकी ऊसदराचे रेकॉर्ड मोडण्याची संधी सत्ताधारी संचालक मंडळाला असल्याचे मत जाणकार व्यक्त करीत आहेत.